Kriza energjetike që ka kapluar Evropën duket se do të rikthejë për të parën herë që nga viti 1970 shkëputjen me orare të caktuara të rrymës në Britaninë e Madhe.
Mbretëria duket se është futur në recesion dhe inflacioni vijon të rritet, kjo edhe prej barrës së rëndë të taksave të aplikuar nga Konservatorët në pushtet, ndërsa familjet britanike janë lajmëruar sot se ndërprerja e energjisë mund të zgjasë deri në tre orë (nga ora 16:00 deri në orën 19:00) në janar dhe shkurt, nëse rezervat e gazit janë të ulëta.
Lajmërimin e ka bërë shefi ekzekutiv i Rrjetit Kombëtar të Energjisë dhe Gazit, John Pettigrew, i cili specifikoi se ndërprerjet do të ndodhin në “ditët vërtet, vërtet të ftohta gjatë javës”, nëse Britania nuk arrin të sigurojë furnizime të mjaftueshme me gaz nga Evropa.
Duke folur në Samitin e Tranzicionit të Energjisë të Financial Times, Pettigrew paralajmëroi se termocentralet e Britanisë me gaz, të cilat prodhojnë një pjesë të madhe të energjisë së vendit, po përballen me një mungesë të konsiderueshme karburanti.
Kjo, e kombinuar me shpejtësinë e ngadaltë të erës për turbinat e erës dhe importet më të ulëta të energjisë elektrike nga Evropa, do të ushtronte tendosje të tepërt në rrjet dhe mund të çonte në mungesa drastike të energjisë, duke kërkuar ndërprerje të koordinuara.
Paralajmërimi i Pettigrew i bëri jehonë atij të Operatorit të Sistemit të Energjisë Elektrike të Rrjetit Kombëtar (ESO), i cili në fillim të këtij muaji tha se familjet dhe bizneset mund të përballen me ndërprerje të planifikuara tre-orëshe për të siguruar që rrjeti të mos futet në kolaps.
Por një lëvizje për të zbatuar ndërprerjet e energjisë elektrike do të kishte nevojë për miratim nga qeveria si dhe nga mbreti Charles.
