Kryeministri Edi Rama pas një jave në “arrati” sa në Ankara dhe sa në kryeqytetet e tjera europiane, është rikthyer këtë të hënë në Shqipëri dhe javën e ka nisur jo nga zyra e shefit të qeverisë, por nga selia e Partisë Socialiste.
Në një video selfie të postuar në Facebook, Rama shihet duke hyrë në zyrën e tij në selinë rozë, ku kreu i qeverisë mban edhe dy breshka.
Teksa futet brenda ai nuk lë pa i përshëndetur dhe pa i nxjerrë në kamera miqtë e tij të vegjël. Më tej ai ulet në karrigen e zyrës së tij dhe u uron shqiptarëve një javë të re me shumë shi, pasi kjo do të ndihmonte për të ulur inflacionin, që sipas Ramës e solli lufta e Putinit.
“Mirëmëngjes, mirëmëngjes, qenke zgjuar eee. Mirëmëngjes. Paçi një javë të mbarë me sa më shumë shi mundësisht. Shiu nuk duhet të na harrojë sepse na duhet për të luftuar inflacionin e luftës së Putinit që nuk e kemi sjellë ne por duhet të bëjmë çmos që ta lehtësojmë për të gjithë ju. Një javë sa më të mbarë”, shprehet Rama.
Kryeministri në vijim e vendos theksin edhe te zgjedhjet lokale, ku shprehet se do të nisë shumë shpejt dialogu i PS me të gjitha komunitetet për rrugën drejt fitores.
“Një ditë e re, një javë e re. Në zyrën e Partisë Socialiste për të nisur edhe një rrugë të re drejt një fitoreje të re, atë të zgjedhjeve vendore në dialog me komunitetet në të gjithë Shqipërinë për qeverisjen vendore dhe sfidat e përbashkëta”, thotë ai.
