Nesër, studentët do të nisin vitin e ri akademik, e për këtë ministrja e Arsimit, Evis Kushi ka pasur një urim për ta e pedagogët, por pa përmendur në asnjë moment bojkotin e paralajmëruar.
Në urimin e saj, Kushi ka renditur arritjet sipas saj në Arsim, teksa ka pasur edhe një mesazh për pedagogët.
Ministrja nuk i ka kthyer përgjigje për kërkesat e tyre, por shprehet se shpreson që të rrisin bashkëpunim mes palëve.
“Dy fjalë edhe për ju, të dashur kolegë pedagogë. Dua t’ju shpreh respektin dhe mirënjohjen time maksimale për punën dhe përkushtimin tuaj në formimin e profesionistëve të së ardhmes. E në këtë fillim viti akademik, kam besim që ne do t’i rrisim më tej përpjekjet dhe bashkëpunimin për të bërë më të mirën për studentët tanë, por edhe për të rritur performancën në të gjitha aspektet akademike e universitare, në funksion të zhvillimit të vendit. Mbështetja jonë edhe për ju do të vazhdojë pa u ndalur”, shkruan Kushi në FB.
Sic kanë lajmëruar akademikët, e Hëna e 17 Tetorit – që përkon me nisjen e vitit të ri akademik, do të jetë një ditë proteste.
