Eksportet shqiptare ranë në shkurt për të nëntin muaj me radhë duke vendosur kështu një rekord të ri me performancë negative. Të dhënat e fundit zyrtare nga Instituti i Statistikave tregojnë se muajin e kaluar, kompaninë shqiptare eksportuan në tregjet e huaja 17.56 miliardë lekë mallra me një rënie prej 4.5 për qind krahasuar me një vit më parë.
“Ulja vjetore e eksporteve prej 4,5 % këtë muaj është ndikuar kryesisht nga grupet: “Minerale, lëndë djegëse, energji elektrike” me -12,9 për qind, “Materiale ndërtimi dhe metale” me -2,7 për qind, si dhe “Makineri, paisje dhe pjesë këmbimi” me 2 për qind”- raportoi INSTAT.
Ky është muaj muaji i nëntë me radhë që eksportet shqiptare rrudhen në terma vjetorë, çka përbën një seri të paprecedentë negative në shkëmbimet tregtare me jashtë. Në total si dymujor për periudhën janar-shkurt të këtij viti eksportet kanë rënë me 6.1 për qind krahasuar me vjet, nga 36.1 miliardë lekë që ishin në 33.9 miliardë këtë vit.
Rriten tekstilet dhe ushqimet
Pork a dy zëra të eksporteve të cilat kanë shënuar një ecuri pozitive. Ato janë eksportet e artikujve bujqësor dhe tekstilet. Sipas INSTAT, eksportet e grupit “Tekstile dhe këpucë” kontribuan me +9,3 për qind në rritjen e eksporteve ndërsa ato të grupit, “Ushqime, pije, duhan” kanë kontribuar me +2,8 për qind.
Por sërish, rritja e eksporteve në këto dy grupe ka qenë e pamjaftueshme për të kompesuar rënien e fortë në eksportet e grupit të energjisë dhe materialeve të ndërtimit e metaleve.
Importet rriten
Ndryshe nga eksportet, importet e mallrave të huaja drejt Shqipërisë kanë shënuar ecuri pozitive. Sipas INSTAT, në shkurt importet u rritën me 6.8 për qind në vlerë krahasuar me shkurtin e vitit të kaluar.
“Rritja vjetore e importeve prej 6,8 % këtë muaj është ndikuar kryesisht nga grupet: “Tekstile dhe këpucë” me +3,3 pikë përqindje, “Produkte kimike dhe plastike” me +2,9 pikë përqindje, “Makineri, paisje dhe pjesë këmbimi” me +2,4 pikë përqindje, tha INSTAT. Ndërsa në rënie kanë kontribuar si dhe “Minerale, lëndë djegëse, energji elektrike” me -3,6 pikë përqindje. Në total si dyn mujor importet këtë vit janë rritur me 3 për qind duke arritur në 76.3 miliardë lekë nga 74.1 që ishin.
