Dita e parë e vitit akademik 2022-2023 do të nisë me protesta. Pedagogët shprehen të vendosur në kërkesat e tyre drejtuar qeverisë, që deri më tani nuk u është përgjigjur pozitivisht.
Sindikata e Punonjësve të Universiteteve bën me dije se e Hëna e 17 Tetorit – që përkon me nisjen e vitit të ri akademik, do të jetë një ditë proteste.
Kjo protestë vjen pas atyre të 15 shtatorit, 5 tetorit dhe 14 tetorit. Sindikata sqaron se në mungesë të një reagimi zyrtar nga ana e institucioneve që u janë drejtuar, protestat do të vijojnë.
Po ashtu, sindikata informon se i është drejtuar me një kërkesë autoriteteve drejtuese të njësive kryesore të Institucioneve të Arsimit të Lartë (IAL-ve) Publike ditën e djeshme, për të ftuar në protestë edhe punonjësit ndihmës akademikë/administrativë dhe përfaqësuesit e Qeverive Studentore, edhe pse këta të fundit nuk janë anëtarë të Asamblesë së Personelit Akademik.
Akademikët i kanë dërguar një peticion me disa kërkesa qeverisë. Ata kërkojnë rritje 50 për qind të pagave bazë sipas titujve shkencorë në dy faza, vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie, rritje të financimit për kërkimin shkencor, rivlerësim të orës mësimore leksion e seminar, rishikim të tatimit prej 23% mbi pagesën e ngarkesës shtesë, si dhe transparencë mbi buxhetin dhe të ardhurat e universiteteve publike.
Më herët gjatë ditës së sotme, edhe Unioni i Këshillave Studentorë doli me disa kërkesa drejtuar Ministrisë së Arsimit.
Ata kërkojnë rritje të mbështetjes ndaj sistemit të Arsimit të Lartë, duke rritur përqindjen e dedikuar për arsimin në buxhetin e shtetit në normën 4%; uljen e tarifës së studimit për të gjithë nivelet e studimit duke indeksuar tarifat në nivelin 2-fish (dyfish) të normës aktuale të inflacionit; mbështetje për kostot e akomodimit dhe artikujt shkencorë/libra shkollorë duke bërë funksionale uljet prej minimalisht 20% nëpërmjet Kartës së Studentit, si dhe ofrimin e shërbimit dhe aksesit në Bibliotekës Online.
