Policia ka arrestuar këtë të Mërkurë një çift bashkëshortësh pasi u është gjetur një sasi medikamentesh të llojeve të ndryshme, të pashoqëruara me dokumentacionin përkatës në farmaci.
Bëhet fjalë për shtetasin Kristo Angjeli, 64 vjeç dhe Aleksandra Angjeli, 62 vjeçe, të dy banues në Sarandë.
Lajmi është bërë i ditur gjatë një konference për mediat nga drejtori i Drejtorisë Vendore të Policisë Vlorë Kryekomisar Gentian Berberi.
“Operacioni nisi në lagjen nr. 1, Sarandë, ku shërbimet e Policisë, gjatë kontrollit të ushtruar në farmacinë e shtetasve K. A. dhe A. A. (bashkëshortë), gjetën një sasi medikamentesh të llojeve të ndryshme, të pashoqëruara me dokumentacionin përkatës, të cilat ishin futur kontrabandë. Operacioni ka vijuar me kontrollin e banesës së këtyre dy shtetasve, të cilët janë munduar që t’i orientojnë shërbimet e Policisë, në një banesë tjetër, me qëllim shmangien e kontrollit në banesën e tyre”, ka thënë Berberi.
Shërbimet e Policisë gjatë kontrollit të ushtruar në banesën e bashkëshortëve, ku kanë konstatuar dy dhoma në të cilat ishin magazinuar 1287 lloje medikamentesh mjekësore në sasi të ndryshme, me vlerë rreth 70 mijë euro.
Medikamentet mjekësore u sekuestruan në cilësinë e provës materiale.
Materialet për këtë rast i kaluan Prokurorisë pranë Gjykatës së Shkallës së Parë Sarandë, për veprime të mëtejshme, për veprat penale “Kontrabanda me mallra për të cilat paguhet akcizë”, “Tregtimi dhe transportimi i mallrave që janë kontrabandë”, “Ruajtja dhe depozitimi i mallrave kontrabandë”, “Pastrimi i produkteve të veprës penale ose veprimtarisë kriminale” dhe “Fshehja e të ardhurave”, të kryera në bashkëpunim.
