Në 77 vjetorin e tij të lindjes, Edy Reja u kujtua në Itali, mediat i kushtuan artikuj dhe shkrime, në shenjë respekti dhe kujtese për trajnerin e dytë më të vjetër në qarkullim pas Mircea Lucesku-t.
Çuditërisht, Edy Reja u harrua vetëm nga Federata Shqiptare e Futbollit, asnjë postim në faqet zyrtare, diçka që nuk ndodh shpesh, pasi FSHF është gjithnjë pranë lojtarëve dhe anëtareve të stafit në raste të tilla. Vetë Edy Reja, në një intervistë për mediat italiane, u shpreh se ndihet mirë dhe do të vijojë të bëjë punën që bën pavarësisht moshës:
“Do të eci përpara për sa kohë jam mirë. Me Shqipërinë angazhohem, por nuk është aq e rëndë se sa të jesh trajneri i një ekipi. Kur e dashuron diçka që bën është mirë që të vazhdosh ta bësh”, u shpreh Reja ndër të tjera.
Në fakt, mosha dhe forma i tij, ka qenë shpesh objekt debati, mbase një arsye pse Federata ka harruar ta uroj në faqet zyrtare. Edy Reja ka një kontratë me FSHF-n deri në nëntor të këtij viti, Reja dhe FSHF do të respektojnë kontratën deri në fund, për tu ulur më pas në një tavolinë për të diskutuar mbi të ardhmen e cila duket larg përfaqësueses kuqezi.
