Detaje të reja kanë dalë në dritë nga dëshmia e dy vëllezërve Indrit e Gentian Beqiraj, të cilët u arrestuan pak ditë më parë gjatë operacionit “Porositësit”, ku edhe rrëfyen pjesëmarrjen në disa atentate.
Dy vëllezërit përveç masakrës së Don Boskos, ku do të vritej Geron Hasanbelliu, por u ngatërrua shënjestër nga krahu i djathtë i Kasandër Nogës kanë zbuluar se Kevin Zeneli dhe Ilirjan Feçi do t’i paguanin për të vrarë edhe nipërit e armikut të Nogës.
Vrasja e nipërve të Geron Hasanbelliut sipas dëshmisë që ka bërë publike EuroNews do të bëhej në zonën e Astirit, pasi ishin paguar nga “bosi” që jetonte në Spanjë dhe Zeneli e kishte të regjistruar në telefon si “Fratello”.
Ata tregojnë para efektivëve se do të paguheshin nga 50 mijë euro për secilin nip të Hasenbelliu që do ekzekutonin.
“Gjatë kësaj jave nuk e pamë Geronin fare, por pamë nipat e tij që na vinin para mbrapa. Të gjendur në këtë situatë, Kevi komunikoi me aplikacionin ‘signal’ me shtetasin Kalandër Noga që ishte jashtë vendit dhe që në telefon Kevini e kishte vendosur me emrin ‘fratello’. Na thoshte që ai ishte në Spanjë dhe ky ishte personi qe paguante para për kryerjen e kësaj pune. Na thoshte që meqë nuk po gjeni Geronin, qëlloni nipat e tij. Kemi ndjekur nipat ku për secilin nga Kasandri do të paguhej shuma 50 000€. I ruajtëm për 2-3 ditë nipat ku kemi ardhur në Tiranë me makina me qira së bashku me vëllanë, pra në datën 27/01/2022 kam ardhur në Tiranë dhe ndiqnim nipat te tabakino dhe Kevini kishte marr përsipër detyrën t’na informonte për lëvizjet e nipave”, kanë rrëfyer ata.
Më tej Indrit Beqiraj ka shtuar në dëshminë e tij: “Disa here Kevini thoshte është vetëm, por kur kam kaluar me makinë me vëllain kam parë që ata ishin 4-5 persona dhe rrinin jashtë. Gjatë këtyre ditëve njëherë, kur ishim te fusha e aviacionit dhe prisnim sinjalin nga Kevi kemi parë që tek zona tabakinos kalojnë dy furgona të FNSH”.
Sa i përket raportit me dy porositësit, Feçin dhe Zenelin, duket se dy vëllezërit Beqiraj kanë patur dyshime se mund të “shiteshin” te kundërshtarët.
“Me vëllanë, Gentianin kemi ndjekur Geronin, Feçi kërkonte me insistim ta vrisnim. Geroni erdhi një mëngjes në Don Bosko dhe më pas nuk erdhi më, dyshoj se na shitit Feçi. Kevin Zeneli na gënjente për vëzhgimin e dy nipave të Geronit në kioskën e tyre ‘Astir’. I thashë Feçit se nuk vras të martën se e kam ters, do e vrisja Geronin të mërkurën. Hoqa dorë nga vrasja pasi Kevin Zeneli më gënjente, kisha frikë se më shiste”, ka deklaruar Indriti.
Ndërkohë nga dëshmia e vëllezërve rezultoi dhe se ata kishin frekuentuar lokalin e Aleksandër Lahos i njohur si “Rrumi” për të mbledhur informacione, lëvizje që kishin rënë në sy të njerëzve të “fortit” të Sukthit, të cilët rrëmbyen për disa minuta njërin prej tyre në autostradën Tiranë-Durrës.
