Në hapje të seancës plenare në Kuvend, deputeti i Partisë Demokratike, Tritan Shehu si mjek është sensibilizuar dhe ka bërë thirrje grave për të shtuar kontrollet për të parandaluar kancerin e gjirit.
Në kuadër të muajit “Tetori rozë”, Shehu theksoi se qeveria duhet të shtojë financimet për të përballuar sëmundjen me kura dhe pajisje këtë sëmundje që i merr jetën rreth 360 grave çdo vit.
“Ka qenë një traditë në parlamentin tonë që në këtë muaj të kancerit të gjirit të krijohet sensibilizm në Kuvend. Kjo është e domosdoshme jo se kemi të bëjmë me një patologji të rëndë, por duhet sensibilizim, të institucioneve shëndetësore, të qeverisë. Të përballesh me tumore dhe në shpëtim të jetëve të njerëzve. Sot tumoret nuk janë më ai djalli i zi vdekjeprurës, por element dhe patologji e rëndë, por me organizim të mirë të sistemit shëndetësor, me diagnostikim të hershëm dhe me mjekim adekuat, janë arritur suksese të mëdha në uljen e vdekshmërisë. Sot ka shifra inkurajuese me një nivel 60-70 % e tyre. Një kategori e madhe që mund të përfitojnë janë padyshim zonjat që preken nga tumoret e gjirit. Kemi raste me vdekshmëri 360 në vit nga vdekshmërisë nga tumoret e gjiri. Ka vend shumë për të folur, për të shtyrë qeverinë dhe për të shtuar financimet”, tha Shehu.
Nuk vonoi përgjigja e kryeparlamentares Lindita Nikolla e cila tha se duhet të nxisim vajzat dhe gratë për t’u diagnostikuar.
“Ministria e Shëndetësisë ka hartuar një program për mamografinë e lëvizshme. Të shtyjmë sa më shumë gratë dhe vajzat të bëjnë mamografi”, tha Nikolla.
