Dy vëllezërit Klement dhe Eldi Çala të cilët janë të arrestuar si protagonist të grabitjes në aeroportin e Rinasit, janë dënuar sot me burg nga Gjykata e Posaçme.
Sipas vendimit Klement Çala do të dënohet me 20 vite burg dhe Eldi Çala me 17 vite burg, ndërsa nënvizohet se dënimin do ta vuajnë në një burg të sigurisë së lartë.
Ndërkohë të arrestuarit e tjerë, Oltjan Veseli, Renaldo Sula, Saimir Cela, Elton Pikli dhe Alkond Bengasi dënohen të gjithë me nga 17 vite burg.
Edhe pse Prokuroria e Posaçme kundër Krimit dhe Korrupsionit kërkoi në total 157 vite për grupin, Gjykata vendosi në total dënimin me 122 vite burg për 7 të pandehurit për grabitjen e eurove nga aeroporti i Rinasit.
Dy vëllezërit nga Elbasani u arrestuan në vitin 2020, pas 3 vitesh arratie të suksesshme, ku i kishin shmangur disa aksione të policisë për ndalimin e tyre. Mbi 300 forca policie nga Tirana, Durrësi, RENEA dhe ato FAST morën pjesë në megaoperacionin për kapjen e tyre.
Gjurmimi i tyre u bë me metoda speciale të hetimit, pasi shpesh herë ata ndryshonin edhe vendbanimet.
Në momentin e ndërhyrjes, Klement dhe Eldi Çalës iu sekuestruan 3 pistoleta, dy makina dhe dy motorë, si dhe një shumë prej më shumë se 100 mijë eurosh.
Sipas policisë, paratë e gjetura të fshehura në pjesë të ndryshme të makinës, brenda garazhit të vilës ku ata jetonin dyshohet të jenë ato të grabitura në Rinas më 9 Prill të 2019-ës.
Asokohe mbeti i vrarë edhe organizatori i grabitjes, anëtari i bandës së “Babagjyshave”, Admir Murataj.
Për këtë ngjarje policia vuri në pranga 7 persona. I pari që u arrestua ishte Alkond Bengasi, dëshmia e të cilit zbuloi edhe pjesëtarët e tjerë të grupit.
Bashkë me të, blutë prangosën edhe të cilësuarin si ‘daja’ nga Kosova Ragip Hajdini, Elton Pikli, Renaldo Sulaj, Oltion Veseli, Saimir Çelën dhe punonjësin e kargos në Rinas, Hasan Kanaçin.
LISTA:
Klement Çala, 20 vjet burg
Eldi Çala, 17 vite burg
Oltian Veseli, 17 vite burg
Renaldo Sula, 17 vite burg
Saimir Çela, 17 vite burg
Elton Pikli, 17 vjet burg
Alkond Bengasi, (i penduar i drejtësisë) 17 vite burg
