Kryetari i Partisë Demokratike, Sali Berisha i ka bërë thirrje sot qytetarëve në të gjithë vendin që të dalin në protestë në mbështetje të pedagogëve të universiteteve të Shqipërisë.
Pedagogët kanë paralajmëruar se nuk nis viti i ri akademik nëse nuk plotësohen kërkesat e tyre mes të tjerash më e rëndësishmja rritja e pagave.
Ndër të tjera Berisha shkroi: “Të gjithë në protestë. Mbështetje të plotë protestës universitare!” dhe në vazhdim publikoi thirrjen e sindikatës së punonjësve të universiteteve, ku shpalosen kërkesa të qarta ekonomike”.
Reagimi i plotë i Sali Berishës:
“Të gjithë në protestë. Mbështetje të plotë protestës universitare! sb
THIRRJE – SINDIKATA E PUNONJËSVE TË UNIVERSITETEVE TË SHQIPËRISË (SPUSH)
SËBASHKU PËR KËRKESAT TONA –
Ftojmë kolegët e universiteteve në mbarë Shqipërinë të mbështesin Protestën e Datës 5 Tetor 2022, ora 11.00, para godinës të Universitetit Politeknik të Tiranës.
1.Rritjen e pagave për pedagogët dhe stafin ndihmës-akademik e administrativ
2.Rritjen e financimit për kërkimin shkencor
3.Rivendosjen e shtesave mbi pagë për “Dëmshmëri shëndeti në punë”
4.Rritjen e shtesës mbi pagën për vjetërsinë në punë
5.Rritjen e pagesës së orëve të ngarkesës suplementare
6.Rivlerësimin e orës mësimore
7.Rishikimin e tatimit prej 23% mbi pagesën e ngarkesës suplementare
8.Amendimin pikës C të VKM Nr. 112 për kriteret e marrjes së titullit “Profesor”
9.Për të bërë transparencë mbi buxhetin dhe të ardhurat e universiteteve publike, si dhe përdorimin e tyre”
