Emri i tij që prej largimit nga posti i Presidentit Republikës është lakuar shpesh si një rival që do të rrëzonte në tapet shpresat e Erjon Veliajt për të drejtuar në një mandat të tre të Bashkinë e Tiranës.
Dhe në kulmin e diskutimeve për zgjedhjet lokale të vitit të ardhëshëm, ku Meta ka rrëmbyer edhe vëmendjen teksa është ftuar i pari për diskutime mbi datën e tyre nga pasardhësi i tij në detyrë, Bajram Begaj, kreu i Partisë së Lirisë ka shprehur sot bindjen e thellë të kampit opozitar se mund ta fitojnë kryeqytetin.
Për Metën, Bashkia e Tiranës është missioni më i lehtë për t’u fituar nëse opozita nuk vonohet për të dalë me listat e saj të kandidatëve të përbashkët për Vendoret2023.
Meta tha se çdo kandidat i cili nuk përfshihet në pazare si Basha, mund ta fshijë Veliajn dhe sektin e “Rilindjes” nga kryeqyteti.
“Mund të përmend 7-8 emra që mund ta fshinin Veliajn menjëherë, por duhet një vullnet i qartë të ndërpritet çdo pazar me Veliaj dhe Ramën, të hiqet dorë nga Bashizmi. Kush kandidat është i vendosur të ballafaqohet me Veliajn, absolutisht e fshin menjëherë Rilindjen si një sekt ndaj të cilit Tirana ka shumë për të thënë dhe për ta ndëshkuar në formën më të merituar. Nëse ndryshimi nuk fillon nga Tirana, nga duhet të fillojë?”, tha Meta.
