Bojko Borisov dhe partia e tij “GERB” ishin dy faktorët kryesorë që i vunë “shkelmin” qeverisë proeuropiane të Bullgarisë në fund-qershorin e këtij viti.
Borisov me përkrahjen edhe të qarqeve ruse dhe serbe zhveshi nga kostumi i kryeministrit të bekuarin e Brukselit Kiril Petkov, në atë që është edhe mocioni i parë i suksesshëm i mosbesimit në Sofje në historinë e vonë të vendit.
Asokohe ishte i nxehtë edhe debati për veton e Bullgarisë ndaj Maqedonisë së Veriut, me Borisov, që sipas mikut të tij në Tiranë, Edi Rama bëri të mundur zhbllokimin e negociatave të anëtarësimit duke gjetur votat për t’i dhënë dritën jeshile në Parlamentin e Sofjes.
“Sapo mora një telefonatë nga Boyko Borissov. Nuk mund ta falënderoja sa duhet për mendimin e tij të mirë që më thirri, por mund ta falënderoja për rolin e tij përcaktues në heqjen e VETO-s në parlament! Mik i vërtetë, lider i vërtetë. Partia e tij GERB dhe të tjerët shpëtoi fytyrën e Bullgarisë dhe BE-së! Tani BE duhet të veprojë shpejt!”, shkruante Rama në Twitter më 24 qershor, dy ditë pasi kishte rënë qeveria e Petkov, të cilin shefi i qeverisë shqiptare e kishte sulmuar shpeshherë në mënyrë indirekte.
Por, duket se miku autokrat i Ramës ia pa hajrin investimit të madh për të rrëzuar qeverinë pro-BE që sulmoi qarqet ruse në Bullgari, pasi partia e tij GERB pritet të dalë fituese nga zgjedhjet që u mbajtën sot, duke siguruar 25% të votave.
Exit poll-i i Alpha Research i nxjerr konservatorët e “Gerb” para partisë së rivalit të tij, centristit Kirill Petkov, me 19% të votave.
Megjithatë, ka të ngjarë që Bojko Borisov ta ketë të vështirë të sigurojë partnerë për të formuar një qeveri.
Zgjedhjet e sotme ishin të katërtat në më pak se dy vjet për Bullgarinë, e cila pritet të jetë sërish nën tension pasi partitë politike pritet të prodhojnë një Parlament të fragmentuar dhe bisedimet për të formuar një koalicion qeverisës do të jenë shumë të vështira.
Bullgaria, me një popullsi prej afër 7 milionë banorësh, është në krizë politike që nga viti 2020, kur vendi u përball me protesta mbarëkombëtare pas zemërimit të publikut të akumuluar për shumë vite për shkak të korrupsionit. Pjesa më e madhe e zemërimit ishte lidhur me liderin shumëvjeçar Boyko Borisov, dhe partisë së tij Qytetarët për Zhvillimin Evropian të Bullgarisë (GERB).
