Një shtetas rus i shumëkërkuar nga drejtësia gjermane, për trafikim të narkotikëve, është arrestuar në ambientet e një hoteli në rrethrrotullimin e Durrësit.
Shtetasi D. B., 28 vjeç, lindur në Rusi dhe rezident në Gjermani, u vu në pranga nga FAST Albania, në bashkëpunim me DVP Durrës, Interpol Tirana dhe Interpol Wiesbaden,Gjermani
“Ky shtetas ishte shpallur në kërkim ndërkombëtar nga autoritetet gjermane, pasi Gjykata e Kempten, Bavari, i ka caktuar masën e sigurisë “Arrest në burg, për veprën penale “Trafikimi i narkotikëve”, parashikuar nga Kodi Penal gjerman.
28-vjeçari, në bashkëpunim me shtetas të tjerë, shqiptarë dhe gjermanë, ka trafikuar sasi të mëdha lëndësh narkotike kanabis dhe kokainë, nga Spanja dhe Shqipëria drejt Gjermanisë.
Interpol Tirana, në bashkëpunim me Interpol Wiesbaden,Gjermani, vijon punën për ekstradimin e këtij shtetasi drejt Gjermanisë.”- njofton policia.
