Kryeministri Edi Rama po zhvillon ditën e sotme një takim me kryetarët e bashkive ku ka diskutuar problematikat dhe menaxhimin e mbetjeve në të gjithë qytetet e vendit.
Gjatë fjalës, Rama nuk po e shikonte në sallë kryebashkiakun e Himarës, Jorgo Goron, për të cilin tha se dikur ka ngrënë “dru” publikisht kurse sot kreu i qeverisë ndryshoi qëndrim duke mos i kursyer lavdet.
“Gjatë këtij viti është bërë një punë falë angazhimit shumë serioz të kryetarëve të bashkive, dua të përmend Himarën. Ku është kryetari? Ja. Dua ta përmend si histori suksesi, nuk do të çuditesha fare që të mos ishte këtu sepse ka qenë gjithmonë prezent kur ka ngrënë dru. Është një shembull, shembull për tu marrë parasysh nga të gjithë. Tregon se sa e rëndësishme është që të ndërtohet një raport pozitiv me të gjithë komponentët në territor. Sot ne e shohim të mishëruar në disa shembuj. Pogradeci, ka qenë një zonë për të ardhur keq në aspektin vizual, mes natyrës dhe plehrave të mbetura rrugëve. Kamza, shëmbëlltyra më dramatike e pisllëkut, sot është një pasqyrë pastërtie. Gjirokastra dhe Elbasani, gjithashtu”, tha Rama.
Por çfarë tha Rama një vit më parë për bashkinë e Himarës?
Kryeministri Edi Rama është treguar mjaft i ashpër me akuzat e drejtuara ndaj kryebashkiakut të Himarës, Jorgo Goro, për të cilin kishte kritika të shumta sa i përket pastrimit të plazhit dhe të qytetit të cilin e kishte përfshirë pisllëku.
“Por përtej sezonit, kemi pamje të ndotjes që janë e përditshme, e dhimbshme, e turpshme të bashkisë Himarë, që është simboli të fjeturit gjumë përballë plehut. Jam viktimë si një nga qytetarët e shumtë shkojnë në Dhërmi apo në Himarë. Një pedonale ka Dhërmiu, sikur Jorgua dhe Gjergji të cohej vetë dhe të merrte një trastë në dorë i kishte mbledhur vetë. Pastaj vjen një dudum që nuk e di e cilit vit është dhe bën sikur mbledh plehrat. Më kanë bërë që këtë vit mos të dal fare”, tha Rama një vit më parë.
