Ditën e sotme ka filluar zbatimi i urdhrit që ka dhënë Edi Rama për t’i kaluar shtetit ndërtimet pa leje të cilat kanë lulëzuar në Tiranë nën “bekimin” e kryebashkiakut Erion Veliaj, policisë dhe autoriteteve qeveritare.
Kreu i qeverisë doli sot në një video mesazh duke deklaruar se i janë dorëzuar shtetit rreth 4 mijë e 646 metrave katrorë nga godina e ndërtuar pa leje në qendër të Tiranës, por pa dhënë detaje nëse bëhet fjalë për kullën e quajtur “The Eyes of Tirana” në pronësi të biznesmenit dhe njëkohësisht kunatit të Fatmir Xhafës, Armand Lilos.
“FIRMOSET AKTI I PARË I DORËZIMIT tek shteti i 4 mijë e 646 metrave katrorë, ndërtuar pa leje në qendër të Tiranës, të cilat do të përdoren sipas ligjit për interes publik”, shkruan Rama krah videomesazhit.
“Askush, as opozitat që nuk lënë akuzë pa bërë, as mediat që nuk lënë gjë pa thënë, as drejtësia jo e jo, që nuk lë avlli apo papafingo nëpër periferi pa ndëshkuar, nuk i pa, nuk i tha, nuk i dëgjoi, nuk i kërkoi katet dhe metrat e ndërtuara pa leje për qëllim fitimi deri dhe në mes të Tiranës. Sepse të tërë, ose e kanë të ngjyer gishtin, kush më shumë e kush më pak, kush direkt e kush indirekt, në mjaltin e tullave e të betonit, ose i kanë sytë kaq të verbuara e veshët kaq tapë nga urrejtja që i mbush gojën me shpifje, me gënjeshtra, me akuza që janë shumë të fortë me të dobëtit, por shumë të dobët me të fortit. Ama kush ka kujtesë e di që luftën me ndërtimet pa leje dhe betejën për shijen urbanizuese dhe modernizimin civilizues e kam nisur bashkë me politikën, pa e reshtur kurrë, me shumë arritje, por dhe me disa dështime”, thotë Rama në mesazhin e tij.
“The Eyes of Tirana” në pronësi të biznesmenit dhe njëkohësisht kunatit të Fatmir Xhafës, Armand Lilos me kompaninë e tij “Arlis Ndërtim” është një prej biznesmenëve më të mëdhenj të ndërtimit në Tiranë, përfitues i shumë tenderave bashkiakë nga Erion Veliaj me të cilin së bashku me Xhafën kanë kompleksin “Square 21” me kulla të larta.
Prej disa ditësh deputeti i Partisë Demokratike, Ervin Salianji denoncon nga sheshi “Skënderbej” katet pa leje të ndërtuara në qendër të Tiranës. Nëpërmjet një deklarate për mediet, Salianji denoncoi një tjetër kullë pa leje në mes të Tiranës, për të cilën është dhënë leje nga kryeministri Rama. Salianji tha se sipas lejes kulla duhet të kishte vetëm 33 kate, por në realitet janë shtuar dhe shumë kate tjera.
