Nga Boldnews.al
Kompania farmaceutike, “CFO Pharma” ka qëlluar me fat shumë të madh. Ajo fiton miliona nga tenderat publikë nga strukturat shëndetësore, megjithëse shpesh paraqet ofertën më të lartë.
Pak ditë më parë, “Boldnews.al” raportoi se “CFO Pharma” u shpall fituese e një tenderi me vlerë 30 milionë lekë të vjetra nga Njësia e Kujdesit Shëndetësor në Shkodër, pasi më herët u skualifikuar tre kompani që kishin paraqitur oferta më të ulta. E njëjta situatë është përsëritur në një tender të mbyllur së fundmi nga Spitali Rajonal Durrës.
Strukura shëndetësore në qytetin bregdetar shpalli në 25 Gusht procedurën tenderuese për “Blerje pajisje mjekësore për sallën e Urgjencës”, me fond limit 62 milionë lekë të vjetra.
Në tender rezulton se morën pjesë 3 operatorë ekonomikë. Sipas dokumentave zyrtare, të konsultuar nga “Boldnews.al”, rezulton se “CFO Pharma” është shpallur fituese e tenderit, megjithëse ajo nuk ka dhënë ofertën më të ulët.
Para se të shpallej ky rezultat, autoriteti kontraktor, pra Spitali Rajonal i Durrësit, kishte eleminuar dy konkurentët e tjerë në garë.
Në përfundim, “CFO Pharma” fitoi tendering me ofertën 60 milionë lekë të vjetra, ose rreth 2 milionë lekë më pak se sa fondi limit. Edhe në këtë rast, ashtu siç ndodhi me tenderin e fituar nga “CFO Pharma” në Shkodër, ekspertët e prokurorimeve do të ngrinin “flamurin e kuq”.
Procedura e zhvilluar nga Spitali i Durrësit plotëson dy kriteret bazë për të ngritur pikëpyetje mbi të gjithë tenderin. Procedura është fituar nga kompania që nuk ka pasur ofertën më të ulët dhe fituesi është shpallur pasi janë eleminuar të gjithë konkurentët e tjerë në garë.
