Gazetari turk Ahmet Emre Olur, i cili u dëbua nga vendi ynë disa ditë më parë, ka kallëzuar penalisht Shefin e komisariatit të policisë Kufitare të Rinasit, Përparim Demën për shpërdorim detyre. Avokati i tij Arben Llangozi, tregoi se Olur me origjinë turke, udhëtoi nga nga Abu Dhabi dhe u drejtua në Serbi e më pas në Shqipëri.
Sa i përket dëbimit të gazetarit, avokati tha se kemi të bëjmë me një ekstradim pa vendim gjykate ndërsa shtoi se shteti shqiptar i bëri një favor në shkelje të procedurave shtetit turk. Më tej avokati tha se për jetën e gazetarit turk vendos vetëm gjykata nëse ai do ishte në kërkim ndërkombëtar.
“Në Serbi, shteti turk kërkoi që këtë shtetas ta marrë dhe ta ekstradojë drejt Turqisë, por nuk ishte futur në kërkim ndërkombëtar. Donin ta ekstradonin. Serbia nuk e ka pranuar procedurën e parregullt dhe i thanë Olur të largohej nga Serbia. Ai zgjodhi të vijë në Shqipëri. Më datë 17 në orën 2:00 të mëngjesit vjen në Shqipëri dhe u shoqërua nga Policia e Rinasit.
Nuk ishte në kërkim, shteti ynë i ka bërë një nder shtetit turk duke e dëbuar për në shtetin e origjinës që është Turqia. Ky shtetas duhet të pyetej nga autoritetet shqiptare nëse donte të shkonte drejt vendit të tij. Nuk duhet ta ekstradonte, ekstradim pa vendim gjykate”-tha Llangozi.
Avokati deklaroi më tej se gazetarit i është cënuar jeta ndërsa shtoi se ai rrezikon deri në 7 vite burg vetëm se ka publikuar video kundër pushtetit në Turqi.
“Forma dhe mënyra si do trajtohet ky shtetas në Turqi, si do trajtohet, në mënyrë ligjore apo jo ligjore. Kanë filluar procedurat jo ligjore nga autoritetet shqiptare.
Kur mbërriti në Turqi gazetari Olur, ministri atje ka falënderuar autoritetet shqiptare që i sollën ‘një delenxhi dhe një mashtrues më pak.’ Hakmarrje nga ministri turk, diskriminim.”-tha Llangozi per Syri tv.
Sa i përket kallëzimit që kanë bërë ndaj Shefit të komisariatit të policisë Kufitare të Rinasit, Përparim Dema, avokati Llangozi tha se ky i fundit nuk e lejoi të takojë klientin e tij në shkelje të rregullave dhe tashmë e pret burgu pasi ai i ka firmosur të gjitha shkresat.
“Kam bërë kallëzim për momentin që shpërdoroi detyrën shefi i komisariatit, për moslejimin e të drejtës së ushtrimit të profesionit tim, kam të drejtë të takoj klientin në mënyrë konfidenciale dhe s’ma privon një shef këtë. Ai cënoi punën time, që s’është detyrë e tij.
Mendoj se qëndron diçka tjetër pas kësaj, por deri tani kjo është bërë me firmën e tij, mund ta ketë thënë Rama, ministri, por përgjegjës që ka firmosur për shkresat është shefi i policisë. Punonjësi i policisë duhet të zgjidhte detyrën ose burgun, në këtë rast do shkojë në burg.”-tha Llangozi.
