Një ish-zyrtar i Lartë i Byrosë Federale të Hetimit, FBI, është vënë në shënjestër nga prokurorët amerikanë.
Bëhet fjalë për Charles McGonigal, i cili ka dalë në një hetim me dyer të mbyllura përpara një jurie të madhe dhe akuzohet për lidhje me Rusinë dhe qeveri të tjera të huaja.
Në lajmin që publikon agjencia e lajmeve amerikane Insajder, ai përshkruhet si person me lidhje me Bosnje Hercegovinën, Shqipërinë, Kosovën dhe Malin e Zi.
Në artikull ai citohet dhe si mik i kryeministrit shqiptar Edi Rama.
Lidhur me këtë çështje ka reaguar dhe kreu i Partisë Demokratike, Sali Berisha,i cili deklaron se kryeministri Edi Rama dhe përfaqësuesi i tij Dorian Duçka janë në hetim nga FBI-ja.
Përmes rrjeteve sociale duke ju referuar lajmit të Insajder për ish-zyrtarin e lartë të FBI-së nën hetim për lidhje ruse, Berisha thotë se lidhja e tij private është Edi Rama dhe se një juri e madhe me mandatin e saj ka kërkuar ti sillet çdo gjë dhe të gjitha regjistrimet që dokumentojnë çdo komunikim personal me mesazhe celulari, mesazhe e-maili elektronik, mesazhe në aplikacion të inkriptuar celulari, mesazhe zanore, letra, ose shënime midis Charles McGinogal dhe midis të tjerëve, përfshi këtu kryeministrin Edi Rama.
Sipas Berishës, juria e madhe kërkon hetimin e çdo udhëtimi në Republikën e Shqipërisë të mikut të Edi Ramës nën hetim për lidhje ruse, zyrtarit të niveleve më të larta të FBI, Charles Mc Gonigal si dhe pagesa apo dhurata të dhëna Charles McGonigal nga përfaqësuesi i Ramës Dorian Duçka, Agron Neza ose çdo person i lidhur me qeverinë e Republikës së Shqipërisë.
