Eksperti i kriminalistikës, Ervin Karamuço ka komentuar sulmet kibernetike që ka bërë Irani, duke u shprehur se qëllimi i këtij sulmi është të shkaktojë terror, kaos dhe destabilizim.
I ftuar në ABC Live, Karamuço theksoi se përveç Iranit është edhe Rusia që na ka sulmuar online.
“Duhet thënë se nga të gjitha sistemet kemi vetëm E-Albania, por të gjitha sistemet e tjera online, të bankës apo të mbrojtjes nuk janë prekur. Është një hartë shumë më e gjerë sulmesh dhe është për të gjithë rajonin. Është një sulm i mirëfilltë terrorist. Ka qëllim të destabilizojë rajonin., Nuk është vetëm Irani. Ka ardhur me shpejtësi. Edhe Kurti ka ardhur me shpejtësi në Tiranë,” tha Karamuço.
Përveç Iranit, Karamuço ka theksuar se sulmet po vijojnë në të gjithë rajonin, madje ai e lidh vizitën e kryeministrit Albin Kurti në Tiranë pikërisht me sulmet që janë zhvilluar në Kosovë.
“Është edhe Irani edhe Rusia. Nuk janë lajme të rastësishme këto. Kaos, panik, destabilizim, terror i përgjithshëm, rënie qeverie. Dhe në vende pro perëndimore” tha Karamuco.
Eksperti i kriminalistikës, theksoi se ka 4 muaj më parë që sulmi i hakerave vijon, ndërsa ka theksuar se priten arrestime dhe urdhër ndalime.
Më 6 shtator, qeveria shqiptare ndërpreu marrëdhëniet diplomatike me Iranin. Vendimi erdhi pasi vendi u godit nga tre sulme kibernetike nga grupe iraniane hakerimi. Hetimet, në bashkëpunim me SHBA-në, arritën në përfundimin se bëhet fjalë për grupe iraniane, të lidhur me strukturat shtetërore.
