Kryeministri Edi Rama dhe Ministri i Brenshëm Bledi Çuçi kanë sulmuar “Top Channel” duke akuzuar për dezinformim, pas raportimeve të televizionit se në pikat kufitare ka akoma probleme me sistemin TIMS.
“Si mund të punojnë portat elektronike në sfondin e gazetares së kësaj kronike që dizinformon totalisht publikun, nëse TIMS do ishte i fikur’, shruan ministri Çuçi në një postim në rrjetet sociale.
Kryeministri Rama, raportimin e Top Channel e ka quajtur ‘një festë tallavaje për ekrane e portale që s’duan t’ia dinë për publikun që i sheh e lexon‘.
Kjo s’është “Festë për kriminelët”po një festë tallavaje për ekrane e portale që s’duan t’ia dinë për publikun që i sheh e lexon, se për më shumë si psh për dinjitetin kombëtar është edhe gjynah t’iu kërkosh!Jo që s’po gënjen qeveria,po vetëm qeveria s’po gënjen në këtë mexhelis! pic.twitter.com/9kujjNDwTe
— Edi Rama (@ediramaal) September 12, 2022
“Kjo s’është “Festë për kriminelët”po një festë tallavaje për ekrane e portale që s’duan t’ia dinë për publikun që i sheh e lexon, se për më shumë si psh për dinjitetin kombëtar është edhe gjynah t’iu kërkosh!Jo që s’po gënjen qeveria,po vetëm qeveria s’po gënjen në këtë mexhelis”, shkroi Rama në Twitter.
TCh raportoi se “ndërsa autoritetet thonë se sistemi TIMS është kthyer në pikat kufitare, një verifikim zbulon se në fakt sistemi nuk është kthyer. Komisariatet nuk mund të ofrojnë shërbime, ndërsa në pikat kufitare, duke nisur nga Rinasi, policët vetëm fotografojnë pasaportat.”
“Në komisariate, efektivëve iu është dhënë një urdhër i brendshëm për të mos i ndezur kompjuterët dhe për të mos i lidhur ato me internet. Gjithë veprimtaria e policisë do të jetë vetëm me shkrim, shkresa me dorë dhe asnjë shkrim me kompjuter. Një fenomen i tillë ka sjellë anomali në punën e policisë, sidomos në rastet kur kemi të bëjmë me persona të shpallur në kërkim, ku policia e ka thuajse të pamundur të identifikojë nëse një person është në kërkim. E njëjta problematikë shfaqet edhe për verifikimin e pasaportave. Një tjetër anomali që prek direkt qytetarët është edhe pagesa e gjobave të ndryshme të vendosura nga policia, pasi prej të premtes hedhja e tyre online ka qenë e pamundur. Në mungesë të TIMS, policia i është rikthyer verifikimit të listave shkresore për shtetasit në kërkim, qofshin këta shqiptarë apo të huaj, por në ditët e një fluksi të lartë hyrje daljesh në kufi, gjithçka vështirësohet”, raporton më tej televizioni.
Megjithatë, përpos akuzave nga qeveria për median në fjalë, fakt është se të dhënat e sistemit TIMS kanë dalë në shitje.
