Kryeministri Edi Rama ka propozuar që gjuha shqipe të futet në çdo nivel të arsimit.
Gjatë fjalës së tij në “Kongresin e Arsimit”, kreu i qeverisë theksoi se gjuha shqipe është më e kërcënuar se kurrë për shkak të avancimit të teknologjisë.
“Është koha për ta diskutuar futjen e gjuhës shqipe në çdo nivel të arsimimit. Është gjë e madhe dhe kërkojmë në vazhdimësi të dimë sa të aftë janë të rinjtë dhe të rejat të dinë të flasin anglisht. Por është realisht një mangësi që nuk kemi të njëjtin sistem për gjuhën tonë amtare që e marrim si të mirëqene. Pasi mësojnë fëmijët tanë të mësojnë dhe të shkruajnë shqip”, tha ndër të tjera Rama.
Rama tregoi si mund të mbrohet gjuha shqipe, nga faktorë të shumte që sipas tij po e kërcënojnë çdo ditë dhe më shumë.
“Shumë kush mund të pyesë, nga se do ta mbrojmë gjuhën shqipe? Përgjigja është e thjeshtë: Mjafton të harxhojë secili një orë për të lundruar në kanalet e informacionit që të shikojë se cfarë ndodh me gjuhën shqipe. Çfarë ndodh me shenjat e pikësimit, cfarë ndodh me pikat mbi ë, cfarë ndodh me formulimin e fjalës dhe me ortografinë në përgjithësi. Ndërsa brezi i ri përfshihet në një shpejtësi marramendëse në rrugën e komunikimit përmes telefonave, PC gjuha është më e rrezikuara dhe nga ana tjetër kjo nuk i ndodh vetëm gjuhës sonë, por të gjitha gjuhëve që janë nën këtë presin të madh, të konsumit të fjalëve për të komunikuar në një moment kur distanca është zëruar dhe shpejtësia bëhet më marramendëse.
Na takon të gjejmë mënyra dhe të kërkojmë përmes një dialogu të gjerë mes nesh, rrugë për ta forcuar pozicionin e gjuhës shqipe në këtë kaos gjuhësor dhe komunikativ ku është përfshirë gjithë bota dhe ne jemi thellësisht të përfshirë”, përfundoi Rama.
