Ministri i Brendshëm, Bledi Çuçi njoftoi këtë të Premte konfiskimin e një sipërfaqeje ndërtimi pa leje, në një kompleks pallatesh në Farkë.
I shoqëruar nga drejtoresha e IKMT dhe zyrtari i Policisë Rebani Jaupi, ministri i Brendshëm Bledi Çuçi u shpreh se vendimi bazohet në vendimin e qeverisë së marrë në mbledhjen e fundit, që ende vijon të mbahet sekret.
Ai tha se nga verifikimi ka rezultuar se pallati në fjalë ka 1200 m² jashtë lejes shtesa kati.
Ndërtimi pa leje përbën vepër penale dhe për raste të tilla të mëparshme autorët e veprës janë arrestuar, megjithatë Çuçi tha sot se ndjekja penale mund të shmanget.
“Në zbatim të vendimit të qeverisë, këtij subjekti do t’i lihet dy opsione në dispozicion. Opsioni i parë është ta parablejë shtesën që është jashtë lejes me çmimin e tregut të indeksuar, dhe në rastin kur e parable këto para do të shkojnë në dispozicion të Agjencisë së Shpronësimeve, në mënyrë që të paguhen shpronësimet për qëllime publike. Opsioni i dytë ta dhurojë këtë volum ndërtimi dhe në këtë rast këto kate shkojnë në favor të entit të banesave për të akomoduar shërbimin social. Nëse nuk zgjedh asnjë opsion do të konfiskohet në bazë të ligjit për interes publik. Nëse zgjedh dy opsionet e para menjëherë nis procesi i legalizimit, dhe i gjithë objekti shkon për t’u legalizuar dhe në këtë rast shmanget edhe ndjekja penale. Në të gjitha rastet, gjoba do të paguhet”, u shpreh Çuçi.
Ai tha se ku operacion do të shtrihet në të gjithë territorin e Republikës së Shqipërisë, jo vetëm në Farkë.
“Kemi filluar nga Tirana, sepse ka presionin më të madh të ndërtimeve, por zbatimi I ligjit do të shtrihet në të gjithë Shqipërinë. Qëllimi është që ky fenomen të marrë fund”, u shpreh Çuçi.
Ditën e djeshme, zëvendëskryeministrja Belinda Balluku njoftoi konfiskimin e një pallati në ndërtim po në Farkë, në pronësi të Lul Morinës. Ajo bëri me dije se godina përbëhej nga 7 katë dhe dy nëntokë, të gjitha pa leje.
Lidhur me nismën foli edhe ish-kryeministri Sali Berisha në një konferencë për mediat këtë të Premte. “Ka filluar tani betejën me katet. Njeriu që kontrollon7 gjithçka, në një pikë të vendimit thotë, ai që do të blejë katet shtesë, le t’i blejë. Kjo është licencë për trafikantët e drogës që të blejnë katet shtesë, pasi të ndërtohen. Trafikantët kanë katet e pallateve si shoping kryesor. Nuk blejnë apartamente ata, blejnë kate. Shqipëria ka ndërtuesin më të lartë të ndërtimit dhe ka çmimet e treta më të larta në Europë. Lumenjtë e drogës blejnë katet. Ky u hap rrugën këtyre për të blerë katet, se nuk lahen ndryshe paratë. Ky nxjerr Pasaportën e Artë dhe bën amnistinë fiskale për të pastruar paratë dhe falimentuar bizneset e ndershme në Shkodër dhe mbarë Shqipërinë,” tha Berisha.