Fsha e re e vendosur nga qeveria për energjinë elektrike ka shkaktuar debate mes forcave politike në Kuvend, me opozitën që ka hedhur akuza për mashtrim ndaj kryeministrit Edi Rama.
Në një komunikim publik më herët gjatë ditës, kreu i qeverisë Edi Rama dhe ministrja e Energjetikes Belinda Balluku bënë me dije se duke filluar nga 1 Tetori, familjet që shpenzojnë më shumë se 800 KW/h energji elektrike do ta paguajnë me 42 Lekë kilovatin mbi këtë fashë, nga 9.5 Lekë që është çmimi aktual.
Fasha 800 KW/h përkon me një faturë mujore 76 mijë lekë (të vjetra). Nga Tetori, çdo KW/h mbi këtë fashë do të paguhet 4.4 herë më shumë.
Sipas qeverisë, një studim i kryer prej tyre ka treguar se 96 përqind e familjeve shqiptare konsumojnë nën fashën 800 KW/h dhe vetëm 4 përqind e kalojnë.
Shifra e prezantuar gjatë konferencës për mediat u risoll në parlament nga kryeministri Edi Rama, gjatë seancës së sotme plenare.
Teksa fliste nga foltorja e Kuvendit, nga vendi ndërhyri deputeti demokrat Helidon Bushati, i cili u shpreh se shifra është e gënjeshtërt. Ai u shpreh se shumë më shumë familje shqiptare shpenzojnë më tepër se 800 KW/h në muaj dhe jo 4% siç deklaron qeveria.
Në përgjigje, Rama iu drejtua: “Çfarë ka ky që ulërin, injoranca nuk ka qenë argument.”
