Numri i punonjësve të Bashkisë së Lezhës është bërë sebep i një konflikti verbal këtë të Mërkurë në komisionin e posaçëm për reformën administrative.
Deputetja demokrate Dhurata Çupi, bashkëkryetare e komisionit, duke iu referuar një shkrese të Ministrisë së Financave pohoi se bashkia e Lezhës e drejtuar nga Ndreu ka 659 punonjës.
Shifra, sipas Ndreut, nuk është e saktë. Ai tha se kjo është shifër që përmbledh punonjësit dhe funksionet e deleguara.
Deputetja demokrate, nga ana tjetër, iu përgjigj se shifra është e lexuar prej saj është në dokumentin zyrtar që ministri e Financave i ka dërguar komisionit.
Ndreu, nga ana tjetër, këmbënguli se ai ka të drejtë. “Nëse ministria thotë ashtu, atëherë ministria ia fut kot. Unë jam autoritet, po flas me kompetencë si kryetar bashkie, nuk jemi në kafe”, tha kryebashkiaku i Lezhës.
Për të shuar debatin ndërhyri bashkëkryetarja tjetër e komisionit Anila Denaj, e cila kërkoi që këshilltarët e Kuvendit ta sqarojnë dokumentin, ndërsa u shpreh se nëse është e nevojshme ti drejtohet një tjetër kërkesë ministrisë për çështjen. Megjithatë, shtoi ajo, nuk mendoj se shifrat e ministrisë janë të gabuara.
