Ministri i Brendshëm, Bledi Çuçi pritet të zhvillojë sot në orën 16:00 një mbledhje me drejtorët e Policisë në qarqe dhe drejtorët e departamenteve.
Pritet që në këtë takim pritet të prezantohet dhe emri i ri i drejtorit të Përgjithshëm të Policisë së Shtetit pas shkarkimit të Gledis Nanos. Muhamet Rrumbullaku është përfolur se do të emërohet në krye të uniformave blu.
Të Mërkurën e 31 Gushtit, ministri i Brendshëm, Bledi Çuçi njoftoi shkarkimin e Gledis Nanos nga drejtimi i Policisë së Shtetit. Arsyeja e shkarkimit që përmendi ministri ishte “mospërmbushja e objektivave”.
Pas larimit, Gledis Nano, në një letër me rastin e lënies së detyrës do të përmendte një shprehje të Shimon Peres: “Prej tij kam mësuar dhe nuk e kam harruar për asnjë çast thënien se: ‘Gjëja më e rëndësishme në jetë është të guxosh. Gjëja më e ndërlikuar në jetë është të kesh frikë. Por, më e zgjuara në botë është përpjekja për të qenë një person me moral’”.
Në një intervistë për një televizion francez, Nano u shpreh se gjatë kohës që ushtronte detyrën, janë arratisur 14 krimilelë të rrezikshëm, pasi janë dekonspiruar operacionet e policisë për kapjen e tyre.
Pas kësaj interviste do të reagonte kreu i Partisë së Lirisë Ilir Meta, i cili u shpreh se “tani është e qartë se cili është objektivi që nuk realizoi Policia e Shtetit, që solli si pasojë shkarkimin e Drejtorit të Përgjithshëm”. “U dekonspiruan vetëm 14, por duhej të dekonspiroheshin të gjithë. Çdo shtet ka mafien e tij, por këtu mafia ka shtetin e vet. Ndaj një orë e më parë për të shporrur Kryeministrin e Krimit dhe Shpopullimit”, tha Meta.
Kreu i PD-së, Sali Berisha u shpreh se Gledis Nano u shkarkua nga detyrua e Drejtorit të Policisë për të mbuluar aferat e Edi Ramës.
