Forca të Inspektoratit të Mbrojtjes së Territorit po kryejnë shembje që prej mëngjesit të kësaj të Premteje në “Prestig Resort”.
Deri më tani, është parë se mjetet e punonjësve të IKMT-së kanë shembur murin rrethues të një prej pishinave, si dhe kanë nisur edhe prishjen e pishinës. Ndërkohë, në resort kanë qenë të pranishëm pushues.
Përfaqësues të “Hysenbelliu Group”, që ka në pronësi “Prestig Resort”, u shprehën se asnjë ndërtim brenda resortit nuk është pa leje, madje kanë shtuar se leja është firmosura nga vetë Edi Rama.
Ata u shprehën se ky është një sulm i jashtëligjshëm nga kryeministri Edi Rama për shkak të qëndrimeve që mbajnë mediat në pronësi të “Hysenbelliu Group”.
Akuza janë hedhur edhe ndaj Dallëndyshe Bicit, për të cilën përfaësuesit e biznesit thanë se po vepron shkelje me ligjin sapo erdhi në krye të IKMT-së.
Nga ana tjetër, IKM nuk ka asnjë reagim zyrtar lidhur me aksionin.
“Rama është munduar të negociojë për editorialin e News 24 dhe Panorama, por editoriali s’ndryshon. Ne nuk mposhtemi me këto fadroma dhe Dallandyshet që ke zgjedhur ti. Sot kanë ardhur 100 turistë amerikanë që do bëjnë një dasme, çfarë ti themi ne që këtu vendos një kokë?! Kemi turistë nga Europa që janë të shokuar. Shteti te ne është kthyer në privat sikur është në pronën e tij. Këtë që po bën sot do ta mbajë mend. E gjithë leja është firmosur nga ai, se ku është shkelur këtu ligji, vetëm ai e di! Dallëndyshja të shohë ato dosjet që ka në prokurori”, u shpreh nënpresidentja e “Hysenbelliu Group”, Fabiola Hysenbelliu.
“Inspektorati s’ka zbatuar ligjin dhe procedurën ligjore që duhet bërë, që do të thotë vihet te subjekti, sillet një vendim, që s’ka ardhur. Dhe i tregohet fakti që është apo jo apo leje, i jepet kohë 30 deri në 45 ditë për ta shembur vullnetarisht, ose i jepet kohë që ti drejtohet gjykatës. Këto procedura s’janë zbatuar. Kjo s’bëhet për ndërtim pa leje, por sepse pronari është botuesi i një prej grupeve mediatike më të mëdha,për shkak të qëndrimeve që mban ky grup në përditshmëri. Kjo synon një sulm kundër fjalës së lirë, medias, grupeve mediave që s’janë rreshtuar në krah të mazhorancës dhe qeverisë”, tha Alfred Peza, drejtori i “Panorama”, pjesë e “Hysenbelliu Group”.
Deputetët e Partisë së Lirisë, Petrit Vasili dhe Erisa Xhixho ishin po ashtu në ambientet e “Prestig Resort”, ku u shprehën se aksioni është i paligjshëm dhe një goditje nga Edi Rama.
Lexo edhe:
Ministria e Brendshme për aksionin te “Prestige Resort”: Ka ndërtime të paligjshme
Shembjet te “Prestige Resort”/ PD: Dënojmë dhunën shtetërore të pushtetit të Ramës
Aksioni te “Prestige Resort”/ Meta: Koha për ti vënë rruspat regjimit të rruspijeve
