Një pakistanez është vënë në prangat e policisë së Gjirokastrës, pasi është kapur teksa ndihmonte dhe shoqëronte emigrantë, me qëllim kalimin e paligjshëm të kufirit, kundrejt fitimit, njofton policia.
Arrestimi i shtetasit me inicialet J. A., banues në Pakistan u bë falë operacionit policor të koduar “Road Guard 36”.
Ai u kap në vendin e quajtur “Ura e Lumit”, duke shoqëruar 6 emigrantë të paligjshëm nga vendet MENA, kundrejt fitimit.
Gjatë kontrollit fizik, iu gjet një sasi lënde e dyshuar narkotike cannabis sativa, e cila u sekuestrua në cilësinë e provës materiale, së bashku me një aparat celular dhe mjete identifikimi.
Ai akuzohet për veprat penale “Dhënia ndihmë për kalim të paligjshëm të kufirit” dhe “Prodhimi dhe shitja e narkotikëve”.
