Shefi i politikës së jashtme të Bashkimit Evropian, Josep Borrell deklaroi dje në mbrëmje se ndalimi i hyrjes në bllok për të gjithë shtetasit rus nuk ishte një ide e mirë, mes raporteve që vendet anëtare po përgatiteshin të pezullonin një marrëveshje të vizave me Moskën.
“Unë nuk jam në favor të ndalimit të dhëniesvi së vizave për të gjithë rusët”, tha Borrell në një intervistë për ORF.
Borrell tha se nuk besonte se ndërprerja e kontaktit me civilët rusë do të kishte rezultate pozitive dhe se nuk besonte se përmes këtij vendimi mund të arrihej unanimiteti i kërkuar mes shteteve anëtare.
Borrell tha se ishte e nevojshme të rishikoheshin disa procese të vizave për grupe të caktuara rusësh.
“Duhet të jemi selektivë, nuk mund të marrim një masë të përgjithshme”, tha ai, duke shtuar se ishte i sigurt se do të kishte një qasje të ekuilibruar nga ministrat e Jashtëm të BE-së në takimin e javës së ardhshme.
Ideja e kufizimit të turistëve rusë në BE ka lindur kohët e fundit pasi vendet dëshmuan se rusët mbërrinin për pushime verore përmes vendeve fqinje të BE-së.
“Financial Times” raportoi më herët se vendet anëtare të BE-së po përgatiteshin të pezullonin një marrëveshje për lehtësimin e vizave të vitit 2007 me Rusinë për shkak të luftës në Ukrainë.
“Ministrat e jashtëm të BE-së do t’i japin mbështetje politike pezullimit të marrëveshjes në një takim jozyrtar dyditor në Pragë të martën dhe të mërkurën”, njoftoi gazeta britanike.
