Presidenti i Shqipërisë, ish-Gjeneralmajori Bajram Begaj, e ka vlerësuar mjaft arritjen e marrëveshjes Kosovë-Serbi për zgjidhjen e konfliktit të dokumenteve të kalimit në kufij për qytetarët e dy vendeve.
Begaj u shpreh në Twitter se ishte pikërisht dialogu ai që çoi në këto rezultate, padyshim i mbëshetur nga BE dhe SHBA.
“I emocionuar kur dëgjova të rejat rreth marrëveshjes për lehtësimin e udhëtimit ndërmjet Kosovës dhe Serbisë, – shkroi Presidenti i Shqipërisë. – Kjo është në interesin më të mirë të të gjithë qytetarëve. Vlerësim për dialogun që çoi në rezultate konkrete dhe mirënjohës për mbështetjen e BE-së dhe SHBA-së.”
Të gjitha forcat politike në Shqipëri e kanë vlerësuar sot, arritjen e marrëveshjes së parë Kosovë – Serbi pas javësh tensione dhe kujtojmë këtu se Shqipëria dërgoi nga ana e saj, vetëm 4 ditë më parë, kontingjentin e dytë me 30 forca komando nga Regjimenti i Operacioneve Speciale – ROS në kuadrin e misionit të KFOR.
