Drejtoresha e Institutit të Shëndetit Publik, Eugena Tomini informoi sot se në vend po qarkullon varianti BA4 dhe më shumë ai BA5 i Omicron.
“Ne konfirmojmë prezencën e varianteve BA4 dhe BA5 në vend. Pas konfirmimit të mostrave pozitive në laboratorin e ISHP-së, 230 prej tyre u dërguan në laboratorin e referencës në Gjermani. Nga totali, mbi 83% ishin BA5 dhe një përqindje e vogël, rreth 4% ishte BA4”, tha Tomini në një prononcim për mediet
Sipas saj, vijon një pozitivitet i lartë i prezencës së rasteve me COVID-19 në 24 orë.
“Ky pozitivitet reflektohet edhe me prezencën e rasteve spitalore që kanë klinikë dhe sëmundje bashkëshoqëruese, duke rënduar klinikën. Ndalesa e dozave të vaksinimit apo mosvaksinimi i plotë, na japin një tablo klinike më të rënduar të rasteve”, tha Tomini.
