Pas debatit publik të shkaktuar nga publikimi i udhëzuesit për terapinë hormonale, Eugena Tomini ka deklaruar se dokumenti nuk përbën një protokoll zyrtar trajtimi dhe as nuk parashikon zbatim të menjëhershëm të terapive hormonale.
Në një intervistë në A2 CNN, Tomini theksoi se bëhet fjalë për një dokument orientues të hartuar nga specialistë të endokrinologjisë pranë Qendra Spitalore Universitare Nënë Tereza, në kuadër të përafrimit të standardeve shqiptare me direktivat e Bashkimi Europian në sektorin e shëndetësisë.
Sipas saj, dokumenti është pjesë e procesit të përafrimit të legjislacionit dhe standardeve shqiptare me direktivat e Bashkimi Europian në fushën e shëndetësisë.
“Ne nisemi jo vetëm nga direktiva të Bashkimit Europian, jo vetëm nga akte të cilat përsëri do të përvijojnë në kuadër të përafrimit të direktivave. me Bashkimin Europian, hapa të cilat pasojnë njëri mbas tjetrit në drejtim të arritjes së finishit, atë të aderimit në Bashkimin Europian. Sigurisht që elementë të tjerë të shëndetit apo të shëndetit publik apo të Ministrisë së Shëndetësisë në përgjithësi i atribuohen edhe shumë udhëzues të tjerë apo protokolle klinike, të cilat sigurisht plane veprimi strategji që ecin me të njëjtin hap në drejtim të direktivave të Bashkimit Europian.
Është një udhëzues i cili është hartuar nga shërbimi universitar i endokrinologjisë pra në Qendrën Spitalore Universitare dhe është një grup pune, i cili e ka orientuar hartimin e një udhëzuesi të tillë. Sigurisht që ka kaluar strukturë të cilën siç është agjencia kombëtare e akreditimit në drejtim të profilit që jep udhëzuesi dhe kur themi që është një udhëzues dhe nuk është një protokoll, nuk ka asnjë element referues për sa i përket medikamenteve hormonalë, sepse duhet të kemi një plan të mirëfilltë për përfshirjen dhe për futjen në zbatim të këtij udhëzuesi që më pas nesër do të kërkojë elementë të tjerë administrativ”, tha ajo.
