Policia ka mundur të gjejë në një parcelë afër banesës së 41-vjeçarit, armën pushkë që dyshohet se është përdorur mbrëmjen e kaluar, nga Met Lika për plagosjen e shtetasit Rasim Tafa. Ngjarja ndodhi në fshatin Gjormë të Kurbinit
Met Lika u prangos për veprat penale “Plagosja e rëndë me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.
Shkak i sherrit është bërë lopa që kishte hyrë për kullotë në tokën e autorit, çka ka bërë që konflikti mes tyre të shkojë deri në ekstrem.
“Si rezultat i kërkimeve të shumta gjatë natës, për dokumentimin e plotë me prova ligjore të ngjarjes së ndodhur mbrëmjen e kaluar, në fshatin Gjormë, Kurbin, ku shtetasi M. L. dyshohet se ka plagosur me armë zjarri shtetasin R. T., shërbimet e Komisariatit të Policisë Kurbin kanë bërë të mundur gjetjen në një parcelë afër banesës së shtetasit M. L., e armës së zjarrit që dyshohet se është përdorur për këtë ngjarje. Konkretisht, u gjetën dhe u sekuestruan në cilësinë e provës materiale, arma e zjarrit pushkë, me krehër me 8 fishekë në të dhe me një fishek në fole”, njofton policia.
Lika plagosi me armë një natë më parë bashkëfshatarin e tij pas një sherri për motive të dobëta. Shkak i sherrit është bërë lopa e Tafës që kishte hyrë për kullotë në tokën e autorit. Lika ra në pranga vetëm pak minuta pas ngjarjes, ndërsa 51-vjeçari po merr ndihmë në spital.
