Kryetari i PD-së, Sali Berisha ka prekur problemin e emigrimit masiv të shqiptarëve vitet e fundit.
Në një takim në Dibër me qytetarë, Berisha tha se pasi dolëm nga diktatura komuniste, 32 vite më pas, përsëri rreziku qëndron mbi ne si ‘Shpata e Demokleut’.
“A jemi sot në rrezik apo po e teprojmë duke shpallur një gjë të tillë? A është Shqipëria në rrezik? A është Dibra në rrezik? Apo është një teprim? Le t’u referohemi fakteve. Një komb që humbet me shpejtësi banorët e tij, anëtarët e tij është në rrezik dhe rrezik të madh kudo. Këto 8 vite asnjë komb tjetër nuk ka humbur pjesëtarët e vet sa i kemi humbur ne shqiptarët. Kjo nga viti 2014 gjer sot me statistika të sigurta të BE, vetëm në zonën e BE janë larguar nga Shqipëria 744 417 shqiptarë. Pa llogaritur sa kanë shkuar në vendet e tjera të botës. Po ju jap një shembull tjetër. Greqia pas Luftës së Dytë Botërore ra në luftë civile. Nuk ka asgjë më të keqe për një komb, 1 milion grekë u larguan. Kurse ne për 8 vite jemi larguar 26-27% e banorëve nga Shqipëria”, deklaroi ai.
Berisha u shpreh se “jemi në rrudhje të madhe, në shkretim, po ikën rinia, fëmijët, po ikën e ardhmja”.
Ish-kryeministri shtoi se shqiptarët ikin nga Atdheu prej varfërisë, ndërsa qeveria dhe oligarkët pasurohen.
“Nëse ka një gjë që dërrmon njerëzit është varfëria që i topit njerëzit, është varfëria që i largon njerëzit nga vendi. Pse jemi ne në rrezik? Ne nuk jetojmë në një vend pa rezerva. Jetojmë në një vend me rezerva të mëdha, por pasuritë e këtij vendi janë shndërruar në mallkim për ne. Në vend që të pasurojnë qytetarët, pasurojnë qeveritarët. Rrallë mund të gjesh një vend tjetër që të ketë pasuritë që kemi ne. Por ne biem me shpejtësi në rroga dhe pensione sepse kjo qeveri ato pasuri i shfrytëzon me oligarkët e saj, të cilët e pasurojnë qeverinë, por mjerojnë qytetarët”, tha ai.
Berisha premtoi se “do kthejmë të rinjtë që studiojnë në perëndim, për të zhvilluar Shqipërinë”.
“Rinia, nuk ka dyshim që është problemi themelor. PD duhet të hapet ndaj rinisë me të gjithë potencialin e saj. Por nga ana tjetër, një Shqipëri e çliruar, ose një Shqipëri e ligjit, një Shqipëri e cila vendos të zhvillohet e ka jetike vendosjen e të rinjve në piedestal. Në vitet ’70 një vend në Amerikën Latine shkoi dhe mori një grup ekspertësh në Chicago, ai që e bëri këtë akt ishte gjeneral, por që i bëri vendit një shërbim të jashtëzakonshëm. Kili falë atij grupi ekonomistësh eci me shpejtësi të madhe drejt zhvillimit. Ne ekonomistë do të marrim të rinjtë shqiptarë që janë të shkolluar në mënyrë të shkëlqyer në perëndim dhe që presin me kënaqësi të vijnë në Shqipëri, të punojnë së bashku me ne dhe të zhvillojmë Shqipërinë me shpejtësi, ta shndërrojmë në vendin e ëndrrave të tyre më të bukura. Kohërat që vijnë do të jenë kohëra ndryshimesh të mëdha. Kauzat tona të drejta do të ngadhënjejnë, do të triumfojnë”, tha ai.
