Mediat italiane kanë zbardhur detaje të reja lidhur me një ngjarje të ndodhur në muajin qershor, ku protagonist u bë një shqiptar.
33-vjeçari shqiptar, i cili jeton në Riccione me familjen e tij, mbrëmjen midis 18 dhe 19 qershorit, ka qëlluar me armë zjarri ndaj një banakieri në një lokal në Anzio të Romës, pasi shkëmbeu shikime dhe një bisedë të shkurtër me të dashurën e tij.
Sipas rindërtimit të ngjarjes nga hetuesit, i dyshuari ka hyrë në lokal me të dashurën e tij, banuese në Lazio, dhe është mërzitur kur kjo e fundit ka nisur të bisedojë me personin prapa banakut.
I riu shqiptar e ka sharë dhe kërcënuar, por është bllokuar nga e dashura në momentin kur dukej se po zgjatej për çantën e saj.
Situata u qetësua me ndërhyrjen e pronarit të lokalit, por kur banakieri nuk pranoi t’i kërkonte falje 33-vjeçarit, ky i fundit i është afruar jashtë lokalit dhe nga çanta ka nxjerrë një armë, duke e qëlluar italianin drejt e në kofshë.
I plagosuri është dërguar në urgjencë, nga e cila ka dalë me prognozë 20 ditore. Hetimet e policisë çuan në identifikimin e 33-vjeçarit, i cili ishte kthyer tashmë në Riccione në orët pas ngjarjes.
I riu shqiptar është dënuar nga gjykata e Velletrit, pasi kundër tij rëndojnë akuzat e “vrasjes së mbetur në tentativë” dhe “armëmbajtjes pa leje”.
