Mesditën e 2 gushtit, një skaf me dy motorë të fuqishëm, goditi për vdekje 7-vjeçaren Jonada Avdia, e cila ndodhej në breg të detit me babain e saj.
Skafi drejtohej nga komisari i policisë, Arjan Tase, ndaj të cilit Gjykata vendosi masën e sigurisë “arrest me burg”, ndërsa prokuroria e klasifikoi ngjarjen si “vrasje me dashje në mënyrë indirekte”.
Pas ngjarjes së rëndë ka pasur reagime të shumta, së pari mbi mënyrën se si u tentua të manipulohej dhe më pas interpretohej ajo, si një aksident që ndodh kudo në Botë, ndërsa AMP (Agjensia e Mbikqyrjes Policore) në raportin e saj manipuloi me distancën nga bregu i detit, duke e paraqitur sikur viktima dhe babai i saj po laheshin në një distancë 15 metra.
Sipas raportimeve të News24, policia e Vlorës ishte në dijeni të aktivitetit të ish-shefit të Policisë së Himarës, Arjan Tase, dhe lëvizjeve të tij të dyshimta me skafin e fuqishëm në jug, por askush nuk kishte ndërhyrë.
Mësohet se Policia Kufitare ishte vënë në dijeni nga qytetarë, por edhe nga vetë strukturat e policisë së Arjan Tase kishte një skaf të madh, me të cilin lëvizte nëpër breg duke rrezikuar jetën e pushuesve, por duke qenë se kishin të bënin me një koleg, askush nuk ndërhyri deri sa ndodhi tragjedia më datë 2 gusht.
Ky ndoshta është edhe shkaku se përse u shkarkua i gjithë zinxhiri komandues i Policisë Kufitare në Vlorë dhe përse ata po hetohen për shpërdorim detyre.
Ndërkohë pas ngjarjes së rëndë ka nisur një kontroll mbi mjetet lundruese në të gjithë vijën bregdetare, ndoshta edhe nga reagimi i fortë qytetar, pasi edhe më parë ka pasur raste kur jeta e pushuesve është rrezikuar seriozisht por askush nuk ka ndërmarrë një kontroll të tillë.
