Mediat britanike i kanë bërë jehonë tragjedisë së ndodhur në plazhin e Potamit, ku 7-vjeçarja Jonada Avdia u vra nga gomonia e drejtuar nga komisari i policisë Arjan Tase.
Kjo për shkak se familja Avdia jetonte në lagjen Barking të Londrës dhe ndodheshin në Shqipëri vetëm për pushime.
“Daily Mail” ka publikuar fotot dhe videot që qarkullojnë në rrjetet sociale të momenteve pas tragjedisë kur babai është përballur me policin. Një tjetër moment që i bëhet jehonë është edhe si Tase u përball me zemërimin e pushuesve që ndodheshin të pranishëm.
“Isha duke u larë së bashku me vajzën time pranë bregut, pashë një varkë të bardhë me dy persona në bord. Varka u parkua në plazh pranë një hoteli dhe pashë një vajzë të zbriste prej andej.
Ai erdhi në drejtimin tonë dhe erdhi me shpejtësi djallëzore dhe më ndau mua dhe vajzën. U zhyta poshtë në ujë dhe anija goditi vajzën time me pjesën e motorit, duke e prerë të gjithën.
Pashë që automjeti u largua, por më pas varkatari u kthye, ndaloi varkën dhe doli në breg” – citohet edhe dëshmia e babait të vajzës nga “Daily Mail”.
Ndërsa “The Sun” nënvizon se ky është aksidenti i tretë i raportuar me skafe në bregdetin shqiptar këtë verë.
Gazeta përmend se muajin e kaluar një çift u dërgua në spital pasi u godit nga një skaf në Jalë, ndërsa dy ditë më vonë një tjetër fëmijë 7-vjeçar u dërgua me urgjencë në urgjencë pas një aksidenti skafi.
Ndërsa “The Mirror” tha se i ka kërkuar një koment për këtë çështje edhe ministrisë së jashtme britanike. /Lapsi.al/
