Të tjera detaje janë zbardhur mbi ngjarjen e rëndë të ndodhur në Potam të Himarës, atje ku Jonada Avdia, 7 vjeç, humbi jetën në bregun e detit, teksa u godit nga një skaf që drejtohej nga komisari i policisë, Arjan Tase. Ndaj këtij të fundit, sot u caktua edhe masa e sigurisë “arrest me burg”, ndërsa prokuroria e ka klasifikuar ngjarjen si vrasje.
Ndërkohë, mediat kanë zbardhur një pjesë të dëshmisë së dhënë në polici nga Bledar Avdia, babai i vajzës që humbi jetën tragjikisht.
Ai thotë se skafi i drejtuar nga Tase e ka ndarë nga vajza teksa ishin duke notuar, por ndërsa ai është zhytur poshtë, motori ka goditur Jonadën duke i shkaktuar dëmtime në të gjithë trupin.
“Ishte ora rreth 14:00 dhe pranë bregut të detit isha duke u larë me vajzën.
Në ato momente pashë një skaf të bardhë, me dy veta brenda tij. Skafi parkoi në bregun e plazhit pranë një hoteli dhe pashë që zbriti një vajzë dhe më pas një grua me dy fëmijë hipën në skaf dhe drejtuesi i skafit kaloi litarin me piketa dhe ishte duke lundruar në drejtimin ku po lahesha me vajzën.
Erdhi në drejtimin tonë dhe hyri me shpejtësi të madhe dhe na ndau mua dhe vajzën. Unë u zhyta poshtë nën ujë dhe skafi goditi vajzën time me pjesën e motorit, duke e dëmtuar në të gjithë trupin. Skafi u largua, por pastaj skafisti u kthye, duke ndaluar skafin në breg”, mësohet të ketë thënë babai i 7-vjeçares.
