Ngjarja e rëndë e ndodhur më datë 2 gusht në plazhin e Potamit në Himarë, ku humbi jetën 7-vjeçarja Jonada Avdia, që u përplas nga skafi që drejtohej nga polici Arjan Tase, bëri që shoqëria shqiptare të reagonte ashpër.
7-vjeçarja u përcoll për në banesën e fundit, ditën e djeshme, ndërsa sot pritet të zhvillohet në orën 19:00 protesta para Ministrisë së Brendshme, për të kërkuar drejtësi për vdekjen e vogëlushes.
Në këtë protestë, kërkohet dorëheqja e ministrit të Brendshëm Bledi Çuçi, Drejtorit të Përgjithshëm të Policisë së Shtetit Gledis Nanos dhe ministres Mirela Kumbaro.
Si ndodhi tragjedia në bregdetin e Himarës
Tragjedia në Himarë ndodhi një ditë më parë (2 gusht). 7-vjeçarja po lahej në breg, ku skafi me dy motorë e goditi rëndë, duke i marrë jetën në vend. Drejtuesi i skafit, Arjan Tase ishte shefi i policimit në komunitet në Elbasan.
Ai u shoqërua në komisariat dhe u përjashtua nga radhët e efektivëve policorë.
Në dëshminë e tij, Tase ka thënë se skafi nuk ishte e tij, por ia ka marrë një të afërmi të tij për përdorim dhe ka shtuar se skafi kishte defekt, e për pasojë ka marrë gaz menjëherë dhe ka bërë një rrotullim në vend dhe ka goditur vajzën 7-vjeçare për vdekje. Ai nuk kishte as patentë skafi.
Tase ka qenë Shefi i Komisariatit të Himarës, por u arrestua pas një operacioni antidrogë, megjithatë, u rikthye sërish në radhët e policisë. Për ngjarjen e rëndë u shkarkua i gjithë zinxhiri drejtues i Policisë së Kufirit dhe Migracionit Vlorë nga detyra.
Kjo nuk është hera e parë gjatë këtij sezoni veror që ka pasur persona të plagosur si pasojë e mjeteve lundruese që humbin kontrollin. Manovrat e rrezikshme disa here u kanë rrezikuar jetën pushuesve, siç ka ndodhur në Jalë, ku drejtuesi i një skafi Gjergj Priftuli aksidentoi një çift pushuesish. Kjo temë është rikthyer sërish në vëmendje të opinionit shqiptar, pasi i kushtoi jetën një fëmije.
