Nga Boldnews.al
Komisari i policisë, që duhet të ishte mbrojtës i qytetarëve edhe kur shëllhej në diell si ‘derri në ledh’, u kthye në vrasës. “Pa dashje” -thotë, “aksident”- thotë, por në fakt është një krim që edhe pse ligjërisht mund të quhet aksident, duket një vrasje me paramendimin. Kur ai që “aksidenton” e quan veten të fuqishëm, të paprekshëm, pareli që mbrohet nga ky pushtet dhe i injekton adrenalinën e dalldisë vetes, përveçse “vrasës” nuk ka epitet tjetër për të. Ish-shefi i Komisariatit të Himarës Arjan Tase vrau me skafin e tij vrau vogëlushen 7-vjeçare, mu bash e në bregun e detit.
Ai nuk kishte patentë për drejtimin e mjeteve lundruese, nuk pyeti për zonën e kufizuar të lundrimit, duke u ekzaltuar nga forca që i jepte uniforma që vetëm një vit më parë e kishte përdhosur në akuzën për lejimin e kultivimit të kanabisit në zonën që mbulonte. E larguan nga aty dhe e dërguan në “vendin e pëllumbave”, në qytetin e Elbasanit. Po komisar e lanë, duke i dhuruar postin e kreut të “policimin në komunitet”, aty në këtë qytet ku ligjin e bëjnë ende bandat kriminale që një herë në dy vite thirren për të dhënë kontributin në pushtetimin e Rilindjes.
Po të superpushtetshit çfarë thonë? Reagime pati nga kryeministri Edi Rama dhe ministrja e tij Elisa Spiropali. Rama shprehu ngushëllimet dhe kërkon që autori të ndëshkohet me forcën e ligjit, po ashtu edhe ministrja Spiropali nuk kishte si te ishte jashtë linjës së idhullit, por shkon edhe më tej…
“E vrau papërgjegjshmëria. E vrau dalldia. Ia preu në mes jetën krimi i dikujt që moskontrolli i vetes e shndërroi nga polic, në vrasës. Nxis një hetim të shpejtë dhe të drejtë”-shkruan ndër të tjera Spiropali. Në fakt ajo ka të drejtë që e vrau dalldia, por nuk shkon më tej për të shpjeguar qartësisht se cila dalldi?
Ajo është dalldia që vetë qeveria ua ka lejuar drejtuesve të tillë të policisë, këtyre personazheve që uniformën e shtetit e kanë kthyer në shërbim të pushtetit. Këtu marrin dalldinë, sigurimin e paprekshmërisë dhe forcën e stisur të marrinës njerëzore që sot i morën jetën një vogëlusheje që kishte ardhur bashkë me prindërit nga Anglia për pushime në vendlindje.
Sot ishte në det, nesër do të jetë në arkivol e mbuluar nga dheu padrejtësisht dhe jo vetëm nga një aksident që ndodh kudo… Shumë “aksidente” bashkë nuk mund të quhen më të tillë, por “vrasje nga pushtetimi”.
Ministri i Brendshëm urdhëroi të fiket muzika një javë më parë vetëm se iu prish “gjumi” teksa pushonte në Vlorë. Po skafet dhe mjetet e tjera ujore që rrezikojnë pushuesit në çdo moment përse nuk urdhëroi që të ndaloheshin? Kjo nuk përbën shqetësim për “veshët ministrore” pasi majë skafit shëtit një pasunar që i bën dua pushtetit, një i pushteshëm kriminël që të thyen kokën me paranë e drogës, një drejtues policie që harbohet dhe vret një vogëlushe.
Kjo është dalldia e dallgëve të pushtetit që bën sikur “qan” në rrjetet sociale dhe ngreh kamerat gati për t’i dhënë jehonë kryeministrit kur rend pas ngushëllimeve me dekorata në duar për të mbuluar vdekjet në det, nga harbimi i të pushtetshmëve të paprekshëm apo nga mungesa e rojeve bregdetare që po lenë pushuesit të mbyten.
Dalldi që nuk dihet deri kur do marrë fund!
