Marius Musaku, autori i mbajtjes peng të Ersida Dyrmishit, për 9 ditë në një banesë në periferi të qytetit të Durrësit, ka qenë me precedentë të mëparshëm penal. Ai është arrestuar në vitin 2018, me të njëjtën akuzë, atë të heqjes së paligjshme të lirisë, ndërkohë që viktimë ishte ish-bashkëshortja e tij, e cila e kishte denoncuar më herët dhe për dhunë në familje.
Do të duhej një denoncim i ish-vjehrrit të tij asokohe, që të bihej në gjurmët e Musakut, i cili e mbante peng ish bashkëshorten po në Durrës. Në rrethana që ende nuk dihen ai ka fituar lirinë, dhe pas 4 vitesh përsërit të njëjtën histori.
Këtë herë me Erisa Dyrmishin, nënë e dy fëmijëve të mitur, me të cilën bëjnë me dije burime nga policia ka pasur njohje të mëparshme, edhe pse nuk specifikohet se cila ka qenë ajo.
Dyrmishi u mbajt peng për 9 ditë në një hotel të Durrësit, ndërkohë që familjarët kishin kërkuar dhe ndihmën e mediave dhe qytetarëve për gjetjen e saj. Musaku dyshohet se ka abuzuar seksualisht me të renë, duke e kërcënuar dhe për jetën e familjarëve të saj.
Ajo është arritur të gjendet dhe me ndihmën e policisë, ndërkohë që Musaku është vënë në pranga nën akuzat e “Heqja e paligjshme e lirisë”, “Shtrëngimi apo pengimi për të bashkëjetuar ose për të lidhur apo zgjidhur martesë” dhe “Marrëdhënie seksuale me dhunë me të rritura”.
Ndërkohë në dëshminë e tij në policinë e Durrësit, Musaku është shprehur se nuk e ka mbajtur pa dëshirë Dyrmishin, dhe se së bashku kishin një histori dashurie.
“Nuk e kam mbajtur peng. Ajo ka ardhur me dëshirën e saj. Ne kemi një hsitori dashurie, kemi qenë bashkë këto ditë”, mësohet të jetë shprehur Musaku.
Historia me ish-bashkëshorten
Marjus Musaku dhe bashkëshortja e tij prej gati një viti (2018) ishin të ndarë nga njëri-tjetri. Konfliktet e vazhdueshme të çiftit kishin bërë që e reja ti jepte fund lidhjes duke u kthyer për të jetuar në banesën e prindërve.
Mbrëmja e së premtes do të ishte një mbrëmje tmerri për të renë, pasi në banesën e babit të saj do të shfaqeshin dy persona të maskuar, duke e marrë me forcë të renë nga banesa ku ajo jetonte. Mësohet se rreth orës 20:00 të mbrëmjes dy persona të maskuar kanë hyrë në banesën e shtetasit me inicialet F. M., duke marrë me forcë 26-vjeçaren, P. Musaku.
Ajo është futur forcërisht në makinë e cila është larguar me shpejtësi nga banesa. Babai i vajzës ka shkuar menjëherë në komisariat duke treguar për ngjarjen. Ai i ka treguar policisë se dyshon se personi që ka marrë vajzën ka qenë ish bashkëshorti i saj. I moshuari është shprehur se vajza e tij ishte shkëputur nga martesa me të, tashmë të arrestuar pasi ai është person i dhunshëm.
Marjus Musaku është me precedent, pasi ka qenë i dënuar me vendim gjykate për dhunë në familje. Mësohet se dhuna ka qenë shkaku kryesor që të rinjtë kanë ndërprerë dhe marrëdhënien e tyre. Fakt të cilin 27-vjeçari (mosha asokohe) nuk e ka pranuar, duke rrëmbyer mbrëmjen e së premtes në shtëpinë e babait të saj, ku ajo jetonte prej disa kohësh. I riu e mori bashkëshorten e tij dhe u fsheh në Durrës.
Policia pas denoncimit të babait të vajzës u vu në ndjekje të Musakut, duke e gjetur çiftin në qytetin e Durrësit. Musaku, pas rrëmbimit shkoi në Durrës, por pa mundur dot ti shpëtoi policisë. Pas shkëmbimit të informacioneve mes policisë së Lushnjes dhe asaj të qytetit bregdetar policia gjeti vajzën e rrëmbyer në një hotel të qytetit sëbashku me ish bashkëshortin e saj.
Ky i fundit u arrestua në flagrancë nga policia dhe u shoqërua në polici për tu marrë në pyetje, për të mësuar mbi personin tjetër që ndihmoi Muskën për rrëmbimin e bashkëshortes së tij.
