Detaje të reja kanë dalë në dritë nga ngjarja e ndodhur në Tiranë, ku pas një sherri mes dy komshinjve, njëri prej tyre humbi jetën si pasojë e goditjes me grusht në qafë.
Policia ka arrestuar shtetasin Alban Meneri, i cili ka rrahur Nikolin Stakën, që dyshohet se humbi jetën si pasojë e hemoragjisë.
Ngjarja ka ndodhur pasditen e të shtunës, ndërkohë që Staka ka qëndruar për më shumë se 24 orë në reanimacion, pa mundur që të shpëtojë për shkak të hemoragjisë.
”Shërbimet e Komisariatit të Policisë Nr. 2 ndaluan me iniciativë shtetasin A. M., 51 vjeç, banues në Tiranë, për veprën penale “Plagosja e rëndë me dashje”, me pasojë vdekjen.
51-vjeçari, gjatë një konflikti për motive të dobëta, ka goditur me grushte në pjesën e qafës, duke i shkaktuar dëmtime në laring, fqinjin e tij, shtetasin N. S., 56 vjeç, banues në Tiranë, i cili si pasojë e plagëve të marra, ka ndërruar jetë në banesë.
Materialet i kaluan Prokurorisë, për veprime të mëtejshme procedurale”, njoftoi policia e Tiranës.
Si ndodhi ngjarja
Ngjarja e rëndë që ka tronditur Tiranën ka ndodhur fundjavën që lamë pas. 56-vjeçari është goditur për vdekje nga komshiu i tij.
51-vjeçari, me profesion mësues, u vra me grushta nga fqinj i tij, vetëm pse guxoi të mbronte një grua. Gjithçka nisi kur Nikolin Staka, me origjinë nga Laçi, por banues në Tiranë, dëgjoi një sherr poshtë pallatit të tij.
Nga kati i dytë i banesës, mësuesi që kishte jetuar edhe në Belgjikë, nga ku ishte kthyer një muaj më parë, pa shtetasin Alban Meneri që po debatonte me një grua për shkak të një parkimi.
“Si nuk të vjen zor që zihesh me grua,” i ka thënë 56-vjeçari Staka. Por 51-vjeçari Meneri e ka thirrur të zbresë poshtë. “Hajde se ta tregoj unë,” ka thënë ai.
Sapo Staka ka zbritur poshtë, është përballur me furinë e grushtave nga ana e Menerit. Ky i fundit e ka goditur kryesisht në fytyrë dhe qafë, duke i shkaktuar plagë të rënda në laring.
Pas sherrit, Meneri është larguar, kurse Staka është kthyer në banesë, ku ka gjetur vdekjen nga hemorragjia e rëndë. Policia ka arrestuar autorin e ngjarjes, i cili do të përballet me akuzën e plagosjes së rëndë me pasojë vdekjen.
