Pasditen e sotme Qeveria organizoi në sheshin Skënderbej një miting festiv, në kuadrin e 100 vjetorit të marrëdhënieve mes SHBA dhe Shqipërisë, por edhe hapjes së negociatave me BE.
Megjithëse ishte një koncert ku u dhanë edhe mesazhet qoftë nga SHBA apo vende të BE, Rama bëri çmos që të privatizojë festën, madje e paraqiti atë si një matje forcash me mitingun e protestës së organizuar nga opozita në 7 korrik.
Mjafton vetëm fakti se me mijëra punënonjës të administratës nga të katër anët e vendit u sollën të detyruar në sheshin Skënderbej për të ndjekur koncertin, për të kuptuar se Edi Ramës i duhej një pjesëmarrje e madhe, për të vijuar propagandën se njerëzit janë të lumtur, festojnë, kërcejnë e këndojnë, se Qeveria ka mbështetje, dhe se vendi është fanar ndriçues.
Në festë nuk munguan as ata që janë në SPAK për milionat e grabitura, as ata që nesër mund të përballen me SPAK për abuzimet dhe shkeljet e ligjit, dhe sigurisht në rrjeshtat e parë ishin ministrat dhe kryebashkiakë, përfshi edhe Erion Veliajn.
Por duket se më i mallëngjyeri ishte Taulant Balla. Ai nuk e ka mbajtur dot veten, veçanërisht kur u shfaq lideri i Rilindjes, Edi Rama.
Balla struku kokën e tij në gjoksin e Ramës, pak a shumë njëlloj sikundër dikur i faleshin udhëheqësit komunist, diktatorit Enver Hoxha.
Ndoshta në atë kohë Ballës nuk i ka rënë mundësia që të bëjë një veprim të tillë, por sot ia arriti qëllimit dhe me siguri do të bëjë një gjumë të qetë…
