Ballkani i Hapur, sipas kreut demokrat Sali Berisha, është një projekt që e shndërron Shqipërinë në republikën e Jugosllavisë së vjetër dhe fshin Kosovën.
Gjatë takimit me mirditorët, Berisha tha se këtë projekt kishte edhe Enver Hoxha, ndërsa shtoi se Shqipëria s´mund të bëhet pjesë e projektit serb.
“Ballkani i Hapur çfarë është? E ka thënë Aleksandar Vuçiç. 1 javë pasi folën në Novi Sad, aty ku folën kishin vendosur hartën ku e kishin shuar Kosovën, tha se kjo është Jugosllavia e Vjetër+Shqipëria.
Shumë nga ju e dini. Enver Hoxha atë projekt kishte, “Shqipëria Republikë e shtatë e Jugosllavisë”. Si mund të bëhemi ne pjesë e projektit serb? Synon asgjësimin e Kosovës, një copëtim të cilin e ka ofruar në kohën e Millosheviçit me dhjetëra herë dhe një shkatërrim përfundimtar i fshatit shqiptar.
Ata kanë bërë investime gjatë periudhës së Jugosllavisë dhjetëra miliardë ne bujqësi dhe kanë bujqësi të sistemuar të investuar, të subvencionuar. Ne e kemi filluar nga hiçi. I ndërpreu subvencionet, u vendos një sistem fiskal që i shkatërron. Prodhimet e Serbisë janë rritur me 250%. Fermerët po therin lopët, po ikin, po mbyllin serat, po bie prodhimi”, tha Berisha.
