Deputeti i Partisë së Lirisë Petrit Vasili i ka quajtur të pështira dhe qesharake akuzat se Ilir Meta ka qenë bashkëpunëtor i Sigurimit të Shtetit. Vasili tha se LSI e ka mbështetur ligjin për hapjen e dosjeve dhe pastërtinë e figurës me votë që në vitin 2014.
Teksa iu referua mënyrës se si u prodhuan akuzat për Metën, Vasili tha se Autoriteti i Dosjeve dhe Kuvendi duhet të mbajë përgjegjësi ligjore, dhe sipas tij shteti është rrëmbyer.
“Pas dënglave të Taulant Ballës jam i detyruar që të flas jashtë. Banda e Edi Ramës është katandisur ku nuk ka më keq se ku të vejë, ligji i propozuar nga Autoriteti i Dosjeve është ligj që është votuar që në 2014, dhe që është votuar nga LSI.
Ka zero shqetësim për dosjet, shpifjet, manipulimet që kanë lidhje me zotin Ilir Meta, janë jo vetëm të pështira dhe qesharake, por më e rëndë është kapja e institucioneve të shtetit. Ka vetëm një çështje, që është ajo e inceneratorëve dhe vetëm kjo bandë mund ta bëjë.
Përrallat me bashkëpunëtorë imagjinarë i takon Autoritetit të Dosjeve, kanë përgjegjësi të rëndë ligjore, se bashku me Kuvendin, që kanë manipuluar dhe shpifur përpara opinionit publik. Kur manipulon e shkel ligjin, manipulatorët vetëm gjëra të trasha mund të bëjnë. Shteti është rrëmbyer“, u shpreh Vasili.
