Kreu demokrat, Sali Berisha, tha se ish-Hotel Dajti iu dha Bankës së Shqipërisë, për të mbrojtur ndërtesën nga ndonjë kullë.
Berisha tha se u përpoq të mbronte godinën e cila mund të shndërrohej në një shesh ndërtimi, duke tentuar edhe kalimin e Ministrisë së Jashtme, por ajo nuk arriti të zhvendosej.
Lidhur me sheshin Skënderbej, Berisha tha se ai do të ndryshonte, pasi ishte e papranueshme që ai të ishte një shesh apo një hapësirë pa jetë.
“Sheshi është një turp i dheut, është një shesh çnjerëzor, shesh që kryen të vetmin funksion kalim këmbësorësh, kaq. Një shesh gjigant i zmadhuar në përmasa të frikshme dhe që janë tërësisht përveç Koresë së Veriut, nuk gjen kund sot shesh të tillë.
Sheshi duhet rivitalizuar, do punohet me arkitektë. Nuk kam qenë kurrë dakord që të përjashtohet trafiku. Tirana ka probleme me trafiku. Ja përjashtove qendrën nga trafiku, qytetarët marrin me ajër të ndotur helmet. Do rivitalizohet. Unë nuk mund të konceptoj një shesh pa treg, pa jetë, siç është sheshi i sotëm”, tha ai.
Kreu demokrat tha se korsitë e biçikletave do të vazhdonin të ishin ekzistente, pasi nuk mund të hiqeshin.
Berisha tha se ligji për trashëgiminë kulturore do të ishte ndër të parat që do të rishikohej, duke u bazuar në ekspertizën më të mirë europiane të ruajtjes së saj.
