Kryetari i PD, Sali Berisha deklaroi gjatë takimit me intelektualët e Tiranës, se protestat do të vijojnë.
Berisha tha se largimi i Edi Ramës mbetet objektiv absolut.
“Pa protesta këto probleme nuk zgjidhen. Largimi i tij nga pushteti i cili ka ardhur nga vota e dhunuar, duhet të jetë objektivi ynë më absolut dhe ne do t’i përmbahemi. Vështirësitë nuk janë të vogla, ka mbështetjen e George Soros. Vetëm në Europë në politikë Soros ka investuar 18 miliardë euro. Por ne do të rrimë në të drejtën tonë. Kjo është një betejë që ne e bëjmë për demokracinë, për të ardhmen tonë”, u shpreh Berisha.
Ai garantoi se nëse PD vjen në pushtet, njeriu i parë që do të shpallet non grata është George Soros dhe i biri i tij.
Berisha theksoi se se padroni i Edi Ramës ka nisma në OKB për të ndërprerë luftën kundër drogës ndërsa shtoi se Soros është një armik i vlerave.
“Koha po provon se George Soros është armik i vlerave. Nuk kam asgjë me Amerikën, përkundrazi admirimin më të madh. Por me George Soros dhe mafien e tij, ajo është mafia më e rrezikshme e botës. Po del çdo muaj dhe më shumë se çfarë po bën ai në vendin e tij. Kjo që ndodh me drogën në Shqipëri, është politikë e tij.
Sepse padroni i Edi Ramës ka nisma në OKB për të ndërprerë luftën kundër drogës. Ka gjetur një president nga këto të Amerikës Latine dhe ka ndërmarrë nismën. Ku është droga? Ja ku e kemi Laçin.
Ma kanë thënë dhjetëra të tjerë. Kjo është arsyeja që në vitin 2017 kërkova shpalljen e tij ‘non grata’. Dhe ju garantoj se nëse PD vjen në pushtet, njeriu i parë që do të shpallet non grata dhe nuk do të shkelë në këtë tokë do të jenë George Soros dhe i biri i tij.”-tha Berisha.
