Kryetari i Kuvendit dhe LSI-së, Ilir Meta ka komentuar “shqetësimin” e Kryeministrit Edi Rama se Ballkani rrezikohet nga vendosja nën kujdesin e Rusisë nëse SHBA dhe BE do të largojnë vëmendjen nga ky rajon. Por Ilir Meta ka një qasje tjetër për këtë çështje. Sipas tij shqetësimi primar duhet të jetë situata në vend dhe më pas ajo rajonale dhe globale.
“Të rregullojmë një herë punët në vendin tonë. Të shtensionojmë një herë situatën në vend. Për mbyllim reformën zgjedhore. Të vazhdojmë të implementojmë reformën në drejtësi. Dhe pastaj mund të flasim për çështje rajonale apo globale. Shqetësimi ynë për stabilitetin e Shqipërisë duhet të jetë parësor. Pasi nuk ka asnjë vlerë që nëse del në CNN apo në Euroneës që në Shqipëri ka probleme. Ne duhet të shohim stabilitetin e Shqipërisë, stabilitetin e Maqedonisë apo dhe të Kosovës. Ne nuk jemi një vend anti-rus. Ne kemi si synim Bashkimin Europian dhe jemi anëtar i NATO. Me Rusinë ne kemi pikëpamje të ndryshime për disa çështje, siç është Kosova” – tha Meta në Zonë e Lirë.
