Eksperti i shëndetit publik, Erion Dasho, në një lidhje për Fax News ka folur në lidhje me rritjen e rasteve Covid në vendin tonë, dhe rrezikun që shfaqet nga lija e majmunit.
Dasho tha se rritja e infektimeve nga Covid nuk është një fenomen vetëm shqiptar, ndërsa sa i takon lisë së majmunëve, eksperti tha se nuk ka vend për panik.
“Rritja e rasteve të Covid konstatohet në të gjitha vendet e Europës, në Gjermani ku unë jetoj ka po ashtu raste në rritje. Situata e shtrimeve dhe humbjes së jetës janë në nivele jo shqetësuese, kjo ndodh sepse një pjesë e mirë e qytetarëve kanë fituar imunitet. E vetmja masë në Gjermani është mbajtja e maskës në ambiente të mbyllura.
Jam çuditur me vendimin e OKB për ta shpallur linë e majmunit në epidemi, ka 17 mijë raste, dhe 5 vdekje, ndoshta kjo e ka shtyrë OKB për të marrë vendimin. Është duke u përhapur jashtë zonave endemike, duke gjykuar nga numri i infektimeve dhe i jetëve të humbura, deri tani nuk mund të flitet për krahasim me Covid 19.
Ata që kanë lindur përpara viteve 80 janë të vaksinuar për linë e majmunëve. Nuk duket se lija e majmunëve nuk përbën rrezik as për Shqipërinë dhe as për vendet e tjera të botës. Popullata nën moshën 40 vjeç është e pavaksinuar, nuk ka imunitet në raport me linë e majmuneve, fëmijët nën 10 vjeç janë më të ekspozuar.
SHBA e kanë nisur vaksinimin e këtyre moshave, vendet e BE janë duke e konsideruar marrjen e një vendimi të ngjashëm. Lija vetë si sëmundje është zhdukur , ama shumë vende po e rikthejnë vaksinimin, për të dhënë efekt edhe për linë e majmunëve. Vaksina ëe lisë është ajo që lë shenjë në krah”, tha Dasho.
