Policia ka arrestuar sot një 40-vjeçar në Vlorë, pasi një ditë më parë ka plagosur, duke ecur me motoskaf, një fëmijë 7-vjeçar.
Blutë e qytetit bregdetar sqarojnë se drejtuesi i motoskafit nuk ka respektuar kufizmdet me bovat detare dhe është futur po ashtu në një zonë, ku nuk lejohen mjetet lundruese.
Njoftimi i policisë:
Nuk respektoi kufizimin me bova detare dhe u fut në zonën ku nuk lejohen mjetet lundruese, për pasojë dëmtoi një shtetas të mitur, vihet në pranga 40-vjeçari.
Sekuestrohet mjeti lundrues tip motoskaf.
Specialistët për Hetimin e Krimeve në Komisariatin e Policisë Vlorë, në vijim të veprimeve hetimore në lidhje me ngjarjen e ndodhur pasditen e djeshme, në plazhin e Jonufrës, arrestuan në flagrancë, për veprën penale “Plagosja e rëndë me dashje”, shtetasin A. K., 40 vjeç, banues në Tiranë.
Shtetasi A. K. nuk ka respektuar kufizimin me bova detare dhe është futur në zonën në të cilën nuk lejohet lëvizja e mjeteve lundruese, ku si pasojë ka dëmtuar një 7-vjeçar që ishte duke notuar, i cili aktualisht ndodhet jashtë rrezikut për jetën.
Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme.
